«Agrarlyq nesıe korporatsııasy» saqtandyrý syıaqylaryn sýbsıdııalaýǵa ótinimder qabyldap jatyr
ASTANA. KAZINFORM - «Agrarlyq nesıe korporatsııasy» AQ agroónerkásiptik keshendegi saqtandyrý syıaqylaryn sýbsıdııalaý baǵdarlamasy boıynsha ótinim qabyldaý bastalǵanyn habarlaıdy.
QR aýyl sharýashylyǵy mınıstrligi baspasóz qyzmetiniń habarlaýynsha, 2026 jylǵy 16 sáýirden bastap aýyl sharýashylyǵy taýar óndirýshileri ósimdik jáne mal sharýashylyǵy salalaryndaǵy erikti saqtandyrý sharttary boıynsha memlekettik qoldaýǵa ótinim bere alady. Bul tetik fermerlerdiń saqtandyrý shyǵyndaryn edáýir azaıtyp, táýekelderdi basqarýǵa múmkindik beredi.
Baǵdarlama aıasynda aýyl sharýashylyǵy eńbekkerleri jazdyq daqyldardyń egistikterin topyraqtaǵy artyq ylǵaldan, kópjyldyq ekpelerdi, sonyń ishinde alma baqtaryn, sondaı-aq aýyl sharýashylyǵy janýarlaryn – iri jáne usaq maldy, jylqy, shoshqa men qusty saqtandyra alady.
-Baǵdarlamanyń basty artyqshylyǵy – memlekettik qoldaýdyń joǵary deńgeıi: saqtandyrý syıaqysynyń 80 paıyzy bıýdjet esebinen sýbsıdııalanady, al qalǵan 20 paıyzyn sharýalar óz qarajaty esebinen tóleıdi,-delingen habarlamada.
Ótinim qabyldaý merzimi shekteýli. Jazdyq daqyldardy saqtandyrýǵa ótinimder 2026 jylǵy 30 maýsymǵa deıin qabyldanady, al kópjyldyq ekpeler boıynsha – 31 qazanǵa deıin.
Fermerler ótinimderdi AÓK-tegi saqtandyrýdyń aqparattyq onlaın júıesi arqyly, Kezekte.kz platformasynda bere alady.
Osyǵan deıin 4,5 myń agrarlyq sala ókili kóktemgi dala jumystaryna qajet 612 mlrd teńge nesıe alǵanyn habarladyq.
