Agrarlyq nesıe korporatsııasy bankterden 17,75%-ben alyp, kooperatıvterge 12–13%-ben bergen

ASTANA. KAZINFORM — Agrarlyq kredıt korporatsııasy bankterden qarajatty 17,75%-ben alyp, kredıttik kooperatıvterge12–13 paıyz mólsherlememen bergen.

Bul týraly Parlament palatalarynyń birlesken otyrysynda Májilis depýtaty Ulasbek Sádibekov aıtty.

— Kvazımemlekettik sektorda da turaqty problemalar saqtalýda. Bul turǵyda respýblıkalyq bıýdjettiń kvazımemlekettik sektordaǵy iri qarajatyn alýshylardyń biri — «Agrarlyq kredıt korporatsııasy» AQ-nyń jaǵdaıy erekshe nazar aýdartady. Korporatsııanyń jyl basyndaǵy qaldyǵy 43,8 mlrd teńge bolǵanyna qaramastan, oǵan qosymsha taǵy 180 mlrd teńge bólindi. Sonymen qatar, korporatsııa ekinshi deńgeıli bankterden 17,75 paıyz mólsherlememen alynǵan qarajatty 12–13 paıyzdyq mólsherlememen jeke kredıttik kooperatıvterge bergen, — dedi májilismen.

Onyń dereginshe, 2025 jylǵy 1 qańtarǵa qaraı «Agrarlyq kredıt korporatsııasy» AQ-nyń problemalyq nesıe portfeli 112,5 mlrd teńgeni qurady.

— Sonymen qatar, agrarlyq sektorǵa beriletin kredıtterdiń «birlesken jaýapkershilik» tárizdi sharttarynyń tıimdiligi tómen. Óıtkeni bir qatysýshynyń nesıe tólemin keshiktirýi barlyq qatysýshy úshin kredıt jelisiniń jabylýyna alyp kelýde. Osylaısha, aıtarlyqtaı ekonomıkalyq tıimdilik bolmasa da, bıýdjet kvazısektor shyǵyndaryn jabýdyń negizgi kózi bolyp qala beredi, al qaıtarymdylyq pen nátıjelilik mehanızmderi tolyqqandy jumys istemeıdi, — dedi Ulasbek Sádibekov.

Aıta keteıik, Úkimet úıinde Parlament palatalarynyń birlesken otyrysy ótip jatyr.

Osyǵan deıin Joǵary aýdıtorlyq palata tóraǵasy Álıhan Smaıylov Parlament palatalarynyń birlesken otyrysynda jekeshelendirý sharalarynan bıýdjetke túsken kiristerdi atady.