Agrarlyq ǵylymdaǵy júrgizilgen reformalar oń nátıje ákelmedi – Aıdarbek Saparov
Agrarlyq saladaǵy júrgizilgen reformalar olardyń mazmunyn emes, basqarýdyń ákimshilik formalaryn ózgertýmen ǵana shektelgen. Bul týraly Senatta agrarlyq ǵylymdy damytý taqyrybyna arnalǵan Úkimet saǵatynda Aýyl sharýashylyǵy mınıstri Aıdarbek Saparov málim etti, dep habarlaıdy Kazinform.
«Eldegi agrarlyq ǵylymnyń tarıhyna qysqasha toqtalyp ketsem. 1990 jyldary agrarlyq saladaǵy ǵylymı-zertteý ınstıtýttary 31, tájirıbelik sharýashylyqtar sany 34 bolǵan. Ondaǵy ǵylymı qyzmetkerler sany 6580 adam, jer kólemi 2,9 mln gektar jáne 618 myń bas mal bolǵan. Sodan beri agrarlyq ǵylymda 6 ret qaıta qurý, reforma júrgizilgen. Nátıjesinde ǵylymı zertteý ınstıtýttarynyń sany 31-den 11-ge, tájirıbelik sharýashylyqtar 34-ten 17-ge, ǵylymı qyzmetkerler sany 6580-nen 902-ge deıin qysqarǵan. Atalǵan reforma jalǵasyn taýyp, keıingi 2 jyldyń ishinde Ulttyq agrarlyq ǵylymı bilim-berý ortalyǵynyń quramyndaǵy 20 ǵylymı-zertteý ınstıtýty men tájirıbelik stantsııalar joǵary oqý oryndarynyń basqarýyna ótip ketken. Oǵan qosa NANOTs-ty taratý maqsatynda alǵashqy qadamdar bastalyp, ol uıymnan bilikti kadrlarymyz basqa jumys izdeýge májbúr bolǵan. Moıyndaýymyz kerek, agrarlyq saladaǵy júrgizilgen reformalar olardyń mazmunyn emes, basqarýdyń ákimshilik formalaryn ózgertýmen ǵana shektelgen», - dedi A.Saparov.
Bul turǵyda mınıstr atalǵan is-qımyldar saldarynan ǵylymı-zertteý nátıjeleriniń sapasy men tıimdiligi tómendep, ǵalymdardyń kadrlyq quramy nasharlaǵanyn aıtty.
«Oǵan qosa, agrarlyq ǵylymdy qarjylandyrý TMD elderimen salystyrǵanda deńgeıi óte tómen kórsetkishte qaldy. Máselen, 2022 jyly Qazaqstanda agrarlyq ǵylymı-zertteýlerge jumsalǵan qarjy kólemi saladaǵy ishki jalpy ónimniń 0,1 paıyzyn ǵana qurady. Al Armenııada bul kórsetkish 0,3%, Belarýste – 0,6%, Reseıde 1,2 % boldy. Bir sózben aıtqanda, agrarlyq ǵylymdaǵy júrgizilgen reformalar oń nátıje ákelmedi, ǵylym men óndiris arasyndaǵy baılanys nasharlady», - dedi vedomstvo basshysy.
Budan buryn habarlanǵandaı, Senat tóraǵasynyń orynbasary Jaqyp Asanov agrarlyq ǵylymı jetistikter tek qaǵaz júzinde qalyp, óndiriske engizilmeı jatqanyn synǵa alǵan edi.
