Agrarlyq ǵylym men ınnovatsııaǵa bólinetin qarjy kóbeıip keledi
ASTANA. KAZINFORM — Prezıdent Qasym-Jomart Toqaevtyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýyn jáne Memleket basshysynyń tapsyrmalaryn júzege asyrý aıasynda Qazaqstanda agrarlyq ǵylymdy damytýǵa baǵyttalǵan jańa tetikter iske asyrylýda, dep habarlaıdy Úkimettiń baspasóz qyzmeti.
Ulttyq agrarlyq ǵylymı-bilim berý ortalyǵy (UATO) bazasynda bilim, ǵylym jáne bıznesti biriktiretin vertıkaldy ıntegratsııalanǵan agrotehnologııalyq hab qurylýda. Onyń quramyna qazirgi tańda 33 uıym — ýnıversıtetter, ǵylymı-zertteý ınstıtýttary jáne tájirıbelik sharýashylyqtar kiredi.
Ǵylymı salaǵa qarjylyq qoldaý júıeli túrde kórsetilýde. 2025 jyly UATO-ny negizgi qarjylandyrý kólemi 2,6 mlrd teńgege artty. 2024–2026 jyldary baǵdarlamalyq-maqsatty qarjylandyrýǵa jyl saıyn 9,6 mlrd teńge bólinedi. Bul qarajat mal sharýashylyǵy, ósimdik sharýashylyǵy, qaıta óńdeý, veterınarııa jáne organıkalyq eginshilik sııaqty agroónerkásip kesheniniń barlyq negizgi baǵyttaryn qamtıtyn uzaq merzimdi ǵylymı-tehnıkalyq baǵdarlamalardy júzege asyrýǵa múmkindik beredi.
Sonymen qatar, zamanaýı zerthanalar qurýǵa jáne halyqaralyq ǵylymı yntymaqtastyqty keńeıtýge aıryqsha kóńil bólinýde. 2024 jyldan bastap Qazaqstanda Qytaımen birlesken bıologııalyq qaýipsizdik zerthanasy jáne dán sapasyn anyqtaıtyn zerthana jumys isteı bastady.
2025 jylǵy maýsymda organıkalyq ónimderdi sertıfıkattaý ortalyǵy jáne halyqaralyq standarttarǵa saı tamaq qaýipsizdigi zerthanasy ashyldy. Bul ortalyqtar pestıtsıd qaldyqtary, mıkotoksınder, aýyr metaldar men antıbıotıkterdi taldaýǵa múmkindik berip qana qoımaı, «jasyl» óndiris standarttaryn engizýge jol ashady.
Aıta keteıik, mal sharýashylyǵy AÓK-tiń jalpy óniminiń 40%-yn qamtamasyz etip otyr.