Aǵylshyndyq «Chelsı» Konferentsııa lıgasynda qatarynan tórt jeńiske qol jetkizdi

ASTANA. KAZINFORM — Aǵylshyndyq «Chelsı» klýby fýtboldan Konferentsııa lıgasynda qatarynan tórt jeńiske qol jetkizip, 12 upaımen kósh bastap keledi.

Italııalyq maman Entso Mareskanyń shákirtteri sońǵy kezdesýinde Germanııanyń Haıdenhaım qalasynda jergilikti klýbty 2:0 esebimen tize búktirdi.

Ekinshi taımda 51-mınýtta Krıstofer Nkýnký esep ashsa, 86-mınýtta Mıhaıl Mýdrık oıynnyń núktesin qoıdy – 2:0.

«Haıdenhaım» da buǵan deıin jeńilmeı kele jatqan edi.

Londondyq klýbtyń Anglııa chempıonatynda da jaǵdaıy jaman emes, 22 upaımen týrnır kestesinde 3-orynda tur.

Ataqty aǵylshyn klýbtarynyń birinen sanalatyn «Chelsı» Konferentsııa lıgasyndaǵy kelesi kezdesýin 12 jeltoqsanda Almatyda «Astanamen» ótkizedi.

Astanalyqtar Konferentsııa lıgasynda 4 upaımen ázirge 23-orynda tur. Jarysty jalǵastyrýǵa múmkindik beretin 24 komandanyń qataryna iligý úshin Grıgorıı Babaıannyń shákirtteri qalǵan eki matchty barynsha sátti ótkizýi kerek-aq.

Eske sala keteıik, budan buryn Konferentsııa lıgasynda «Astananyń» portýgalııalyq «Vıtorııa» komandasymen teń tarqasqanyn jazǵan bolatynbyz.