Aǵylshyn shabýylshysy Garrı Keın Chempıondar lıgasynda rekord ornatty

ORAL. KAZINFORM — ÝEFA Chempıondar lıgasynyń 1/8 fınalynda ótken match kezinde mıýnhendik «Bavarııa» klýbynyń shabýylshysy Garrı Keın «Baıer» qaqpasyna gol soǵyp, rekordtyq nátıjege qol jetkizdi.

Opta Sport saıty málim etkendeı, G.Keın aǵylshyn fýtbolshylarynan alǵash ret ÝEFA Chempıondar lıgasynyń bir maýsymynda 10 gol soqty. 

Bıylǵy maýsymda 31 jastaǵy shabýylshy «Bavarııa» sapynda barlyq týrnırde 36 matchqa qatysyp, 32 gol soǵyp, 11 nátıjeli pas berdi. 

Transfermarkt ınternet-portalynyń málimetine qaraǵanda, fýtbolshynyń quny shamamen 90 mln eýroǵa baǵalanyp otyr.

Leverkýzende ótken oıynda «Bavarııa» germanııalyq «Baıerdi» 2:0 esebimen jeńdi. G.Keın nátıjeli paspen de kózge tústi. Ekinshi gol avtory — Alfonso Devıs.

Birinshi básekede de «Bavarııa» 3:0 esebimen basym túsken edi. Osylaısha, ataqty mıýnhendik klýb ¼ fınalǵa joldama aldy.

Sondaı-aq shırek fınalǵa «PSJ» (Frantsııa), «Inter» (Italııa) komandalary ótti.

Frantsııalyqtar syrt alańda aǵylshyndyq «Lıverpýl» komandasyn 1:0 esebimen tize búktirdi. Alǵashqy matchta aǵylshyndyq klýb dál sondaı eseppen jeńgen edi. Sondyqtan penaltı serııasynda «PSJ» klýbynyń baǵy jandy — 4:1.

Al ıtalııalyqtar nıderlandylyq «Feıenoordtan» aılasyn asyrdy — 2:1. Birinshi oıynda da «Inter» 2:0 esebimen basym bolǵan edi.

Eske sala keteıik, budan buryn Chempıondar lıgasynda bir oıynshysy kem «Barselonanyń» syrt alańda jeńiske jetkenin jazǵan bolatynbyz.

Sondaı-aq «Barselona» shırek fınaldyń alǵashqy joldamasyna ıe boldy.