Aǵylshyn quqyǵy men tsıfrlyq aktıvter: AHQO ınvestorlardy nesimen qyzyqtyrady
ASTANA. KAZINFORM – «Astana» halyqaralyq qarjy ortalyǵynda qalyptasqan quqyqtyq orta men tsıfrlyq aktıvterdi damytýǵa jasalǵan jaǵdaı sheteldik ınvestorlardyń Qazaqstanǵa qyzyǵýshylyǵyn arttyryp otyr.
Bul týraly Astana Finance Days 2026 aıasynda Janus Henderson Investors kompanııasynyń Taıaý Shyǵys, Afrıka jáne Ortalyq Azııa boıynsha óńirlik basshysy Mıshal Djaber ÁlFaras aıtty.
Onyń aıtýynsha, sheteldik kompanııalar úshin AHQO-nyń basty artyqshylyqtarynyń biri – munda aǵylshyn jalpy quqyǵy qaǵıdattaryna negizdelgen derbes quqyqtyq júıeniń bolýy.
– Mundaǵy qyzmet AHQO-nyń aǵylshyn quqyǵy qaǵıdattaryna negizdelgen táýelsiz zańnamasy aıasynda retteledi. Menińshe, Qazaqstanǵa ınvestorlardy tartyp otyrǵan negizgi sebepterdiń biri de osy, - dedi Mıshal ÁlFaras.
Ol AHQO-da jańa tehnologııalar men tsıfrlyq aktıvterdi damytýǵa erekshe kóńil bólinip otyrǵanyn atap ótti.
Onyń sózinshe, qazir bul baǵyt halyqaralyq ınvestorlardyń qyzyǵýshylyǵyn týdyryp otyr.
– AHQO bul baǵytta úlken jumys atqaryp jatyr. Tsıfrlyq platforma belsendi damyp, Innovation Hub quryldy. Sonyń arqasynda osy salada jumys isteý áldeqaıda qoljetimdi ári júıeli bola tústi, - dedi ol.
Mıshal ÁlFaras Astana Finance Days forýmyna ekinshi jyl qatarynan qatysyp otyr. Ol bıyl forýmnyń aýqymy keńeıgenin baıqaǵan.
Onyń pikirinshe, Qazaqstannyń qarjy naryǵy damı túsken saıyn halyqaralyq kompanııalardyń AHQO-da óz ókildigin ashýǵa qyzyǵýshylyǵy da arta beredi.
Janus Henderson Investors – aktıvterdi basqaratyn halyqaralyq kompanııa. Qazir kompanııanyń basqarýyndaǵy aktıvterdiń jalpy kólemi 500 mlrd dollardan asady. Kompanııa aktsııalar, oblıgatsııalar jáne bıznesti tikeleı nesıeleý baǵytynda jumys isteıdi.
Spıkerdiń aıtýynsha, kompanııa Qazaqstandaǵy jumysyn keńeıtip, elge tikeleı ınvestıtsııa salý múmkindigin de qarastyryp jatyr.
– Biz bul baǵytqa úlken qyzyǵýshylyq tanytyp otyrmyz. Qazir Qazaqstan Úkimetimen yntymaqtastyqty keńeıtý, mundaǵy jumysymyzdyń aýqymyn arttyrý jáne Qazaqstanǵa tikeleı ınvestıtsııa salý múmkindikterin talqylap jatyrmyz, - dedi Mıshal ÁlFaras.
Aıta keteıik, búgin elordada Astana Finance Days forýmy ótip jatyr. Bıylǵy is-sharaǵa álemniń 90 elinen 8 myńǵa jýyq qatysýshy tirkelgen. Forým aıasynda Qazaqstannyń taý-ken jáne kreatıvti ındýstrııa salasyndaǵy jobalary sheteldik ınvestorlarǵa tanystyrylyp jatyr.
