Agenzia Nova QR Prezıdenti teleradıokesheniniń jańa seriktesi boldy
ASTANA. KAZINFORM – QR Prezıdenti teleradıokesheni halyqaralyq seriktestermen jańalyqtar kontentimen almasý salasyndaǵy qarym-qatynasty damytýdy jalǵastyrýda. Italııalyq Agenzia Nova aqparat agenttigi memlekettik medıaholdıngtiń 19-shy seriktesi boldy.
Búgin QR Prezıdenti teleradıokesheniniń basshysy Raýshan Qajybaeva men «Agenzia Nova» aqparat agenttiginiń bas dırektory Fabıo Sgýıllante yntymaqtastyq jáne ózara túsinistik týraly memorandýmǵa qol qoıdy.
Bul qujat Kazinform jáne Agenzia Nova aqparat agenttikteri arasyndaǵy yntymaqtastyqty damytýǵa baǵyttalǵan.
«Qazaqstan Agenzia Nova men Italııa úshin árqashan jaqyn el boldy. Kezinde agenttikte «Qazaqstan» degen jeke aıdar bolǵan jáne bizdiń oqyrmandar sizderdiń respýblıkalaryńyz týraly kóptegen qyzyqty málimetter alatyn edi. Búgingi kezdesý Qazaqstanmen qatar Ortalyq Azııa aımaǵyndaǵy ómir men onda bolyp jatqan oqıǵalar týraly aqparat taratýda jańa múmkindikter ashatynyna senimdimin», - dep atap ótti F. Sgýılante.
«Kontent almasý salasynda jetekshi sheteldik BAQ-pen áriptestik – Prezıdent teleradıokesheniniń mańyzdy baǵyttarynyń biri. Resmı tulǵalardyń saparlary men elderimizdegi qoǵamdyq-saıası oqıǵalardy jarııalaý kezinde ózara aqparattyq qoldaý kórsetý Qazaqstan men Italııadaǵy aqparat agenttikteriniń aýdıtorııasyn aıtarlyqtaı keńeıtedi, sonymen qatar aqparattyq qyzmetterdiń jumysyn sapaly jańa deńgeıge shyǵarýǵa múmkindik beredi», - dep atap ótti R. Qajybaeva.
Kazinform agenttigi – Qazaqstanda halyqaralyq mártebege ıe bolǵan alǵashqy jetekshi memlekettik aqparat agenttigi.
Ol 100 jyldan astam ýaqyt boıy qazaq, orys, aǵylshyn, qytaı, ózbek tilderinde aqparat taratyp keledi. Aqparat agenttiginiń elimizdiń barlyq óńirlerinde óz tilshileri bar.
Agenttiktiń halyqaralyq jelisi álemniń 11 elinde usynylǵan. Ol táýligine 1000 birlikke deıin kontent shyǵarady.
Agenzia Nova – Balqan, Taıaý Shyǵys jáne Afrıka týraly eń iri ıtalııa tilindegi aqparat kózi jáne halyqaralyq saıasat pen ekonomıka týraly jańalyqtarǵa arnalǵan jetekshi ıtalııalyq aqparat agenttigi. Agenttiktiń shtab-páteri Rımde ornalasqan. Jańalyqtar jıyntyǵy kúndelikti 500-den astam habarlamany qamtıdy.
