Agenttiktiń 105 jyldyǵy: «Qazaqstan tarıhy Kazinform fotosýretterinde» atty kórme ashyldy
ASTANA. KAZINFORM — Elordadaǵy MEGA Silk Way saýda ortalyǵynda «Qazaqstan tarıhy Kazinform fotosýretterinde» atty kórme ashyldy. Bul shara Kazinform halyqaralyq aqparat agenttiginiń 105 jyldyǵyna oraı ótkizilip jatyr.
Kórmede 1930 jyldardan búgingi kúnge deıingi qoǵam men memleket ómirinen syr shertetin mańyzdy oqıǵalar jaıly agenttik tilshileriniń biregeı fotomuraǵaty, eksklıýzıvti fotosýretteri usynylǵan.
Keı kadrlar buryn-sońdy esh jerde jarııalanbaǵan.
Olar el tarıhyndaǵy betburys kezeńderiniń qundy eskertkishi sanalady.
Kórme alty bólimnen turady: 1928-1959 jyldardaǵy Qazaqstan jáne Ekinshi dúnıejúzilik soǵys kezi; 1960-1985 jyldardaǵy iri qurylys jobalary, qalalar men óńirlerdiń ekonomıkalyq damýy; Almaty men Astananyń sońǵy 40 jyldaǵy shejiresi; jeke blok áleýmettik-mádenı qaıta qurýlarǵa arnalǵan. Sondaı-aq memlekettiń damýyna úles qosqan kórnekti qazaqstandyqtardyń portretterin tamashalaýǵa bolady.
— Ekspozıtsııada ujymdastyrý men ındýstrııalandyrýdyń, Ekinshi dúnıejúzilik soǵystyń taýqymetin bastan keshirgen, soǵystan keıingi kezeńde ómir súrgen, tyń jerlerdi ıgergen, «ǵasyr qurylysyna» qatysqan, Táýelsizdik tańyn atyrǵan qazaqstandyqtardyń ómiri kórsetiledi, — dep túsindirdi Kazinform agenttiginiń basqarýshy dırektory Naǵashybek Aldan.
Óz kezeginde MEGA Silk Way saýda ortalyǵynyń dırektory Qýat Ákimbaev Kazinform agenttigimen birlesken jobanyń mańyzdylyǵyn atap ótti.
— Biregeı fotosýretter elimizdiń tarıhyna tereń boılaýǵa, belgisiz qaharmandar, oqıǵalar men faktiler týraly baıandaıtyn eksklıýzıvti kadrlardy kórýge múmkindik beredi. Sonyń ishinde Qazaqstannyń sımvolyna aınalǵan Almaty men Astananyń kórnekti nysandary qalaı boı kótergenin beıneleıtin sýretter de bar. Mysaly, MEGA Silk Way salynǵanǵa deıin bul jer qandaı bolǵanyn kópshilik bile bermeıdi. MEGA saýda ortalyqtary elimizdiń iri qalalarynyń landshaftyn ózgertip, kóptegen aýdannyń damýyna serpin berdi, — dedi Qýat Ákimbaev.
Kórmege barlyǵy 188 fotosýret qoıylǵan. Fotokórme 31 tamyzǵa deıin jalǵasady.
Eske salsaq, 13 tamyzda elimizdegi eń kóne medıaresýrstarynyń biri — Kazinform halyqaralyq aqparat agenttigine 105 jyl toldy. Mereıtoı aıasynda agenttiktiń prodıýseri Qalamqas Ábýova, basqarýshy dırektor Naǵashybek Aldan jáne halyqaralyq jańalyqtar qyzmetiniń jetekshisi Juldyz Atageldıeva agenttiktiń damýy, medıakeńistiktegi róli men aldaǵy jospary jaıly kózqarastaryn aıtyp berdi.