Agenttik vıtse-mınıstrdiń dóreki jaýabyna qatysty pikir bildirdi

ASTANA. QazAqparat - QR Ulttyq ekonomıka vıtse-mınıstri Serik Jumanǵarınniń tilshi saýalyna dóreki jaýap berýi oqıǵasyna qatysty mınıstrlik basshysynyń atyna tıisti hat joldandy. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaıymova aıtty, dep habarlaıdy QazAqparat tilshisi.

«Jalpy, Memlekettik qyzmetshilerdiń ádep kodeksi barlyq qyzmetshilerge qatysty. Sáıkesinshe, bul fakti boıynsha máseleniń mán-jaıyn túsinip turmyz», - dep toqtaldy Aıgúl Shaıymova Májiliste tilshilerdiń saýalyna jaýap berip.

Osy oraıda, ol agenttik óz tarapynan tıisti sharalardy qabyldap, atalǵan oqıǵa boıynsha is-qımyldar jasaǵanyn atap ótti.

«Mınıstrdiń atyna tıisti hat joldandy. Bul turǵyda el azamattarymen qarym-qatynasta etıkalyq normalardy saqtaý qajettigi týraly baǵynyshty qyzmetkerlermen qajetti jumystardy atqarý talaby aıtyldy», - dedi Aıgúl Shaıymova.

Budan buryn habarlanǵandaı, búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik qyzmet jáne sybaılas jemqorlyqqa qarsy is-qımyl máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.