Agenttik tutynýshylar quqyqtaryn qorǵaý jumysyna barynsha qoldaý kórsetpek - M.Esenbaev
ASTANA. 15 naýryz. QazAqparat /Arman Asqarov/ - Elimizdegi tutynýshylar quqyqtaryn qorǵaý jumysyna, eń aldymen, qoǵamdyq uıymdar etene aralasýy tıis.
Al biz bolsaq, osy saladaǵy quqyq buzýshylyqtardyń zań júzinde aldyn alýdy qamtamasyz etip, tutynýshylar quqyqtaryn qorǵaý jumysyna barynsha qoldaý kórsetetin bolamyz. Búgin Astanada tutynýshylar quqyqtaryn qorǵaýdyń ózekti máselelerine arnalǵan keńeste QR Básekelestikti qorǵaý agenttiginiń tóraǵasy Májıt Esenbaev osylaı aıtty.
Onyń habarlaýynsha, búginde Qazaqstanda tutynýshylardyń 100-den astam qoǵamdyq uıymdary tirkelgen. Biraq olardyń kóbisi qyzmet etip jatqan joq. «Qazirgi kezde biz, kóp jaǵdaıda, Qazaqstannyń tutynýshylar lıgasymen birlesip jumys isteýdemiz. Bul uıym óziniń ómirsheńdigin kórsetti. Sondyqtan biz aldaǵy ortaq jumysymyzdy osy lıga aıasynda atqarýymyz qajet dep oılaımyn. Búgin rásimdeletin kelisimshartqa sáıkes, biz ortaq maqsatymyz - tutynýshylar quqyqtaryn qorǵaýdy barynsha qamtamasyz etýimiz qajet», - dedi M.Esenbaev.
Búgingi keńestiń nátıjesi boıynsha QR Básekelestikti qorǵaý agenttigi jáne elimizdegi tutynýshylar quqyqtaryn qorǵaý salasyndaǵy qoǵamdyq uıymdar birlesip jumys isteý jónindegi kelisimshartqa qol qoıdy.
