Agenttik tóraǵasy Alık Shpekbaev SQO-da jumys saparymen júr
Memlekettik qyzmet isteri jáne sybaılas jemqorlyqqa qarsy is-qımyl agenttiginiń SQO boıynsha departamenti baspasóz qyzmetiniń habarlaýynsha, agenttik tóraǵasy Alık Shpekbaev pen oblys ákimi Qumar Aqsaqalov keshe Petropavl qalalyq kóshi-qon qyzmeti ortalyǵynda boldy.
«Kóshi-qon qyzmetteri ashyqtyq qaǵıdaty boıynsha kedergisiz beriledi. Burynǵydaı ótkizý beketi joq. Ǵımarat yńǵaıly bolý úshin bólikterge bólingen. Keńes berý, kútý, operatsııa zaldary, aqparatty óńdeý sektory bar. Elektrondy kezek arqyly qyzmet kórsetiledi. Sondaı-aq «Qazposhta» AQ tólem kassasy jumys isteıdi. Eńbek mıgranttary bir jerde barlyq jumystaryn bitiredi», - deıdi Kóshi-qon polıtsııasy basqarmasynyń bastyǵy Talǵat Ábilov.
Mamandardyń aıtýynsha, mundaı úlgidegi kóshi-qon ortalyǵy elimizde aalǵashqylardyń biri bolyp SQO-da jumys istep jatyr.
Alık Shpekbaev ortalyqtyń jumysyna oń baǵasyn berdi. «Open space» ashyqtyq qaǵıdaty boıynsha jumys isteıtin ortalyqta halyqqa yńǵaıly bolý úshin bar jaǵdaı jasalǵan. Al qyzmet kórsetý sapasyn «Digital agent» mobıldi qosymshasy arqyly baǵalaýǵa bolady. Bul qosymshany eldegi tájirıbege súıene otyra jaqynda Ázerbaıjanda da engizbek.
Búgin agenttik tóraǵasy Petropavl qalalyq soty men polıtsııa basqarmasyndaǵy front-ofısterdiń jumysymen tanysady. Dárigerlermen, kásipkerlermen jáne stýdenttermen kezdespek. Tústen keıin Shal aqyn aýdanyna jol júrip, birneshe nysandy aralaıdy.
