Agenttik taýarlyq gaz naryǵyna qatysty túsinik berdi

NUR-SULTAN. QazAqparat – QR Básekelestikti qorǵaý jáne damytý agenttigi tóraǵasynyń birinshi orynbasary Rýstam Ahmetov taýarlyq gazdy bólshek saýdada ótkizý naryǵynda monopolııasyzdandyrý protsesi bastalǵanyn aıtty, dep habarlaıdy QazAqparat tilshisi.

«Taýarlyq gazdy tasymaldaý naryǵynda «Intergaz Ortalyq Azııa» AQ, «Azııalyq gaz qubyry» JShS jáne «Beıneý Shymkent Gaz Qubyry» JShS magıstraldyq gaz qubyrlary jáne «QazTransGaz Aımaq» AQ taratý jelileri boıynsha qyzmetter kórsetetin tabıǵı monopolııa sýbektileri bar. Munda tabıǵı monopolııalar sýbektileri («QazTransGaz Aımaq» AQ, «Beıneý-Bozoı-Shymkent Gaz Qubyry» JShS) shyǵyndarynyń 35%-y gaz qubyrlaryn tehnıkalyq paıdalanýdy aýtsorsıngke berý arqyly memlekettik tarıftik retteýden shyǵaryldy. Nátıjesinde, 2019 jyldan bastap 2021 jylǵa deıin osy jumystardyń quny 42,7%-ǵa ulǵaıdy», - dedi R. Ahmetov Ortalyq kommýnıkatsııalar qyzmetinde.

Onyń aıtýynsha, taýarlyq gazdy bólshek saýdada ótkizý naryǵynda monopolııasyzdandyrý protsesi bastaldy. Máselen, elimizdiń 6 óńirinde jeke operatorlardyń úlesi 15-20%-ǵa jetedi. Bólshek saýda operatory «QazTransGaz Aımaq» AQ-nyń ózi jumys kóleminiń shamamen 70%-yn syrtqy uıymdarǵa aýtsorsıngke berdi.

«Alaıda, «QazTransGaz Aımaq» AQ satyp alatyn bógde uıymdardyń qyzmetterine básekeles qoljetimdilik joq. Máselen, sońǵy 5 jylda syrtqy uıymdarǵa aýtsorsıngke berilgen bıllıng, kólik qyzmetteri jáne «QazTransGaz Aımaq» AQ-tyń ózge de qyzmetterin sol bir jetkizýshiler usynady. Mysaly, bıllıng qyzmetterin birdeı quryltaıshysy bar 10 jetkizýshi usynady. Osylaısha, bólshek saýda operatory jumysynyń keminde 70%-yn aýtsorsıngke berý faktileri, naryqta basqa bólshek operatorlardyń bolýy naryqtyń monopolııasyzdanýyna jáne ulttyq operatordyń aktıvterin jeke kompanııalarǵa berýge daıyn ekendigin bildiredi», - dedi agenttik ókili.

Onyń sózine qaraǵanda, buryn «QazTransGaz» AQ taýarlyq gazdy satyp alýǵa basym quqyq berýi el óńirlerin aýqymdy gazdandyrý qajettiligimen negizdeldi. Sonymen qatar, «Saryarqa» negizgi magıstraldyq gaz qubyryn jáne «QazTransGaz Aımaq» AQ taratý jelilerin salýdy qarjylandyrýdyń negizgi kózderi kompanııanyń syrtqy naryqtarda taýarlyq gazdy ótkizýden (ıaǵnı basym quqyqty paıdalanýdan) túsken kiristeri emes, ıaǵnı qaryz, bıýdjet qarajaty men halyqqa qyzmet kórsetýden tarıftik kiristeri bolyp otyr.

Sonymen qatar, ulttyq operator óziniń satyp alýlaryna jáne qurylys-montajdaý jumystarynyń básekeles naryǵyna qoljetimdilikti shekteıdi.

Budan buryn habarlanǵandaı, qazirgi kezde taýarlyq gaz naryǵyn 95%-ǵa «QazaqGaz» AQ gazdy basymdyqpen satyp alýǵa monopolııalyq quqyqpen usynady.