Agenttik mansapqor memlekettik qyzmetkerler jumys isteıtin mınıstrlikterdi atady
ASTANA. QazAqparat - Bıyl elimizdiń memlekettik apparatynda merıtokratııa qaǵıdalary, ıaǵnı memlekettik qyzmetkerdi onyń jeke qabiletterin baǵalaý negizinde joǵarylatý sharalary is júzinde qolǵa alyna bastady. Osynyń arqasynda mansapqor memlekettik qyzmetkerlerdiń sany artty, dep habarlaıdy QazAqparat tilshisi.
«Endi, memlekettik qyzmetkerler tek konkýrs nátıjesi boıynsha ǵana kóterile alady. Oǵan qosa, úmitkerdiń tómengi satydan bastap, jańa qyzmetke deıingi eńbek tájirıbesi bolýy shart. Buryn bastyqtar óziniń senimdi adamdaryn konkýrssyz taǵaıyndasa, qazir ondaı áreketterge jol berilmeıdi. Sebebi mansaptyq ósý tek tómengi qyzmetten ǵana bastalady. Bul - basty talap» - deıdi Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaımova.
Onyń málimetine sáıkes, jyl basynan beri 3 163 memlekettik qyzmetker tómengi satydan joǵary qyzmetke kóterildi. Atalǵan kórsetkish ótken jylmen salystyrǵanda, úsh esege artyq bolyp tur.
Mansapqor qyzmetkerlerdiń basym bóligi QR Ulttyq ekonomıka mınıstrliginde, QR Densaýlyq saqtaý jáne áleýmettik damý mınıstrliginde, sondaı-aq Soltústik Qazaqstan men Aqmola oblystarynda jumys isteıdi.
«Qazirdiń ózinde memlekettik organdarda bos turǵan bir vakansııadan úmitker azamattardyń sany 5-ke deıin artty. Máselen, Investıtsııalar jáne damý mınıstrliginde bir qyzmetke 6 adam talasyp otyr. Bul - óte jaqsy kórsetkish», - dep atap kórsetti A.Shaımova.
