Agenttik kvazımemlekettik sektorlardaǵy jemqorlyq týraly aıtty

NUR-SULTAN. QazAqparat – Sybaılas jemqorlyqqa qarsy is-qımyl agenttigi kvazımemlekettik sektordaǵy jemqorlyq faktileri týraly aıtty, dep habarlaıdy QazAqparat Agenttiktiń baspasóz qyzmetine silteme jasap.

«Qazirgi tańda enshiles kompanııalardy esepke almaǵanda barlyq oblysta jáne respýblıkalyq mańyzy bar qalalarda jumys istep turǵan 58 sýbekt bar», - dedi agenttik tóraǵasynyń orynbasary Shyńǵys Qabdolla.

Onyń aıtýynsha, kvazımemlekettik sektordaǵy qarjylyq aınalym 2019 jyly 33 trln teńgeden asyp, eldiń Jalpy ishki óniminiń 59,7 paıyzyn quraǵan. Osynshama qyrýar qarajat aınalymyna keıbir basshylar men qyzmetkerler suǵyn qadaıtyn kórinedi

«Jumystyń kúrdeliligi mynada: atalǵan sektorda uıymdastyrýshy-taratýshy jáne ákimshilik sharýashylyqty atqaratyn uıym basshylarynyń ózi jemqorlyq sýbektisine aınalyp shyǵa keledi», - dedi ol.

Osyǵan baılanysty Sybaılas jemqorlyqqa qarsy is-qımyl agenttigi qaıta qurylar kezde jańa Departamentti ashý týraly sheshim qabyldanǵan. Onyń negizgi mindeti – kvazımemlekettik sektorda jemqorlyq qylmystarynyń jolyn kesý.

Spıkerdiń habarlaýynsha, jyl basynan beri Agenttik atalmysh salada 132 qylmysty ashqan. Ol qylmystarǵa qatysty 69 adam qylmystyq jaýapkershilikke tartylyp, 103 is sotqa joldandy. Kóbinese atalmysh salada memlekettik baǵdarlamalardy iske asyrý men memlekettik satyp alýdy júzege asyrýda laýazymyn asyra paıdalanyp, para alý jaǵdaıy jıi kezdesedi.