Agenttik ıpotekany keshirý týraly dáıeksiz aqparatty joqqa shyǵardy

ALMATY. QazAqparat - Qarjy naryǵyn retteý jáne damytý agenttigi nesıe raqymshylyǵy máselesi boıynsha dáıeksiz aqparatqa qatysty túsinik berdi, dep habarlaıdy QazAqparat tilshisi.

Agenttikten málim etkendeı, keshe áleýmettik jelilerde «ıpotekalyq turǵyn úı qaryzy boıynsha kredıt raqymshylyǵy jarııalanypty-mys» degen aqparat taratyldy.

Osyǵan oraı Qarjy naryǵyn retteý jáne damytý agenttigi taratylǵan aqparattyń dáıeksizdigin málimdedi.

«Qazirgi ýaqytta 2007-2008 jyldardaǵy álemdik qarjy daǵdarysynan, sondaı-aq ulttyq valıýta baǵamynyń álsireýinen barynsha zardap shekken ıpotekalyq qaryz alýshylardyń jeke sanatyna kómek kórsetý úshin agenttik 2015 jyldan ıpotekalyq qaryzdardy qaıta qarjylandyrý baǵdarlamasyn iske asyryp jatyr.

Osyǵan oraı, baǵdarlama talaptary boıynsha qarjylyq qoldaý 2004 – 2009 jyldar aralyǵyndaǵy kezeńde ıpotekalyq qaryz alǵan, sondaı-aq, 2016 jylǵy 1 qańtarǵa deıin valıýtalyq ıpotekalyq qaryz alǵan qaryz alýshylarǵa kórsetiledi.

Baǵdarlamada belgilengen qarjylaı kómek sharalary jalǵyz baspanasy bar qaryz alýshylar jáne halyqtyń áleýmettik osal toptary sanatyndaǵy boryshkerler úshin paıyzdyq mólsherlemeni 3%-ǵa deıin tómendetýdi kózdeıdi.

Qalǵan valıýtalyq ıpotekalyq qaryz alýshylar úshin paıyzdyq mólsherleme 12%-dan aspaıdy.

Budan basqa, baǵdarlama sheńberinde syıaqy, aıypaqy (ósimpul, aıyppuldar) jáne komıssııa boıynsha merzimi ótken bereshek esepten shyǵaryldy.

Valıýtalyq ıpotekalyq qaryzdarǵa qatysty bereshekti Ulttyq banktiń 2015 jylǵy 18 tamyzdaǵy baǵamy boıynsha (1 AQSh dollary úshin 188,35 teńge) teńgege konvertatsııalaý júrgizildi.

2020 jylǵy qańtardan bastap baǵdarlamaǵa qatysatyn HÁOT sanatyndaǵy ıpotekalyq qaryz alýshylar úshin qosymsha kómek sharalary iske asyrylýda.

Mundaı qaryz alýshylarǵa qoldaýdy bankter olardyń qarjylyq jáne áleýmettik jaǵdaıyn jan-jaqty taldaý negizinde jeke tártippen kórsetýde, taldaý nátıjelerinen keıin bankter qaryz boıynsha bereshekti tómendetý jáne 20 000 teńge mólsherindegi aı saıynǵy tólemmen jeńildik berilgen kesteler belgileý týraly sheshim qabyldaıdy.

Qaryz alýshylardyń bul sanatyna qoldaý kórsetý 2021 jyldyń sońyna deıin aıaqtalady.

Azamattar men buqaralyq aqparat quraldarynan dáıeksiz málimetterge senbeýdi jáne resmı ári tekserilgen derekkózderinen ǵana alynǵan aqparatty basshylyqqa alýdy suraımyz»,- delingen habarlamada.

Ipotekalyq qaryzdardy qaıta qarjylandyrý baǵdarlamasynyń talaptary men nátıjeleri týraly tolyǵyraq aqparatty agenttiktiń resmı saıtynan alýǵa bolady.