Agenttik departamenti naýryzda syılyq alatyn sheneýnikterge eskertý jasady
ASTANA. QazAqparat - Naýryz aıy mereke kúnderine toly. Osyǵan oraı ShQO boıynsha memlekettik qyzmet isteri jáne sybaılas jemqorlyqqa qarsy is-qımyl departamentiniń qyzmetkerleri sheneýnikterge turǵyndar tarapynan kórsetiletin syı-sııapattarǵa «saq bolýdy» eskertedi, dep jazady Altaynews.
Departamenttiń Ádep keńesiniń kezekti otyrysynda memlekettik qyzmetshilerdiń syılyqtardy qabyldaý máselesi kóterildi.
Jańa jyl merekesi qarsańynda departament mamandary Óskemen, Semeı qalalarynyń birqatar basqarmalarynda, Komıtet pen Agenttikterdiń oblystyq departamentterinde, Ulan, Glýbokoe aýdanynyń bólimderinde reıd júrgizgen bolatyn. Sonyń nátıjesinde K.Lıbkneht kóshesi, 19 ǵımaratyna tátti syılyqtar alyp kirý faktileri áshkerelengen-di. Qazaqstan kóshesi, 59/1 ǵımaratynda ornalasqan memlekettik organdarǵa da jemis-jıdekterge tolǵan kárzeńkelerdi, qymbattyq spırtti ishimdikterdi kirgizýdiń joly kesilgen bolatyn. Syılyqtardy ákelgender negizinen osy organdardyń bólimderiniń qyzmetkerleri men basqa da tulǵalar ekeni anyqtalǵan. Óskemen qalasynyń memlekettik organdary ornalasqan Qazaqstan kóshesi, 27 úıden de «VK Tehnogrýpp» JShS syılaǵan joǵarydaǵydaı syılyqtardy shyǵarý faktisi tirkelgen.
Odan ary qaraı osy sharanyń aıasynda basshylar men olardyń orynbasarlarynyń kabınetterinen sývenır syılyqtar tabyldy.
Otyrysqa arnaıy shaqyrylǵan oblystyq memlekettik múlik pen jekeshelendirý departamentiniń birinshi basshysy Ildar Hasenov sheneýnikterge syılanǵan syılyqtardy memlekettik qorǵa ótkizýdiń tártibimen tanystyrdy.
QR-nyń ákimshilik quqyqbuzýshylyqtar týraly Kodeksiniń 676-babyna sáıkes, jeke tulǵalar memlekettik qyzmetshilerge syı-sııapat kórsetken bolsa, syılyq berýshige 200 AEK kóleminde aıyppul salynady. Osy Kodekstiń 677-babynda sheneýniktiń óz qolymen nemese deldal arqyly syılyq alǵany dáleldense, oǵan 600 AEK kóleminde aıyppul salynatyny kórsetilgen.
Eger jeke memlekettik qyzmetshini nemese memlekettik organnyń jumysyn atap ótkisi kelgender bolsa, olar sol organnyń resmı saıttarynda óz alǵystaryn qaldyrýyna bolady.
