Agenttik Atbasar aýdany men Stepnogor bilim bólimderiniń basshylary ne úshin jazalanǵanyn túsindirdi

NUR-SULTAN. QazAqparat – Mektepter men emhanalardaǵy jemqorlyq jaǵdaılary tekserildi. Bul týraly 1424 Call ortalyǵy qyzmetiniń bıylǵy 10 aıdaǵy qorytyndysyn baıandaý kezinde Sybaılas jemqorlyqqa qarsy is-qımyl agenttigi Strategııa jáne jedel basqarý departamentiniń basshysy Nurlan Jaqsymbetov málim etti, dep habarlaıdy QazAqparat tilshisi.

«Agenttik mektepterde, JOO-larda, emhanalarda aqsha jınaýǵa, dárilik preparattarǵa, medıtsınalyq quraldarǵa jáne basqa da jaǵdaılarǵa, ıaǵnı «turmystyq sybaılas jemqorlyqqa» qatysty ótinishterdi nazardan tys qaldyrmaıdy. 133 osyndaı ótinish kelip túsken. Olardyń barlyǵy qoǵam men arnaıy monıtorıng toptaryn mindetti túrde tarta otyryp, muqııat qarastyrylady. Bul jaǵdaıda ákimdikterdiń tıisti qyzmetteriniń, eńbek ujymdaryniń, ata-analar komıtetteriniń, sondaı-aq ózge de ókilderdiń qatysýymen birlesken keńester ótkiziledi», - dedi E. Jaqsymbetov onlaın brıfıngide.

Onyń aıtýynsha, Atbasar jáne Stepnogor qalalarynyń mektep oqýshylary ata-analarynyń ótinishteri boıynsha mekteptiń «qajettilikterine» aqsha jınaý bóliginde (kvarts shamdary, perdeler, dárethana qaǵazy jáne t.b.) qyzmettik tekserý, sonymen qatar ata-analar arasynda jasyryn saýalnama júrgizildi. Nátıjesinde, joǵaryda atalǵan faktiler rastaldy.

«Tekserý nátıjeleri boıynsha Atbasar aýdanynyń jáne Stepnogor qalasynyń bilim bólimderiniń basshylary mektep dırektorlarymen birge tártiptik jaýapkershilikke tartyldy», - dedi departament basshysy.

Onyń sózine qaraǵanda, Almaty, Jambyl jáne Qostanaı oblystarynda mektep muǵalimderi men kolledj oqytýshylaryn merzimdi baspasóz basylymdaryna májbúrlep jazý faktisi jıilep ketti. Almaty oblysynda zeınetaqynyń bir bóligin baspasóz basylymdary túrinde berý faktisi bar.

«Barlyq ótinishter boıynsha ujymdarda túsindirý sharalary júrgizildi. Osy oraıda bilim berý mekemeleri men «Qazposhta» AQ-nyń basshylaryna aldaǵy ýaqytta osyndaı faktilerge jol bermeý týraly eskerte otyryp, merzimdi baspasóz basylymdaryna erikti túrde jazylýdyń mańyzdylyǵy aıtyldy», - dedi E. Jaqsymbetov.

Budan buryn habarlanǵandaı, 1424 Call ortalyǵy qyzmetiniń bıylǵy 10 aıdaǵy qorytyndysy jarııalandy.