Aǵaıyndylar Qyzylorda oblysynyń meshitterin tonap kelgen
Oqıǵa Jańaqorǵan aýdanyna qarasty birneshe aýyldyń meshitinde bolǵan. Suǵanaq qoldy urylar meshitterge túnde tereze arqyly kirgen. Jáshikterdi buzyp, onda turǵan aqshany alyp ketken.
Bul jóninde meshitter ımamdary Jańaqorǵan aýdandyq polıtsııa bólimine shaǵym túsirdi.
Habarlama boıynsha oqıǵa ornyna jedel-tergeý toptary jiberildi. Polıtseıler izdestirý sharalaryn júrgizdi. Nátıjesinde kúdikti eki azamat ustaldy.
«Kúdiktiler Túrkistan oblysynyń aǵaıyndy 26 jáne 32 jastaǵy turǵyndary ekeni belgili boldy. Olar jasaǵan qylmysyn moıyndady. Qazirgi tańda kúdiktiler ýaqytsha ustaý ızolıatoryna qamaldy. Atalǵan derek boıynsha QR Qylmystyq kodeksiniń 188-baby 3-bóligi 3-tarmaqshasyna sáıkes sotqa deıingi tergep-tekserý amaldary júrgizilýde. Onda turǵyn, qyzmettik nemese óndiristik úı-jaıǵa, qoımaǵa ne kólik quralyna zańsyz kirýmen jasalǵan urlyq jaǵdaıy kórsetilgen. Oqıǵanyń mán-jaıy anyqtalýda», - dep málim etti Qyzylorda oblystyq Polıtsııa departamentiniń baspasóz qyzmetinen.