«Aǵaıyndylar» fılmi Germanııadaǵy kınofestıvalde júldeli boldy

ASTANA. QazAqparat - Qazaqstandyq rejısser Darhan Tólegenovtiń «Aǵaıyndylar» debıýttik tolyqmetrajdy fılmi Oldenburg International Film Festival (Germanııa) kınofestıvalinde júldege ıe boldy. Bul týraly QazAqparat QR Mádenıet jáne sport mınıstrliginiń baspasóz qyzmetine silteme jasap habarlaıdy.

Kınokartına qazylar alqasynyń arnaıy syılyǵy - «Spirit of Cinema» («Kıno rýhy») atalymymen marapattaldy. Júlde retinde rejısserge qola músinshe tabystaldy.

«Aǵaıyndylar» - Oldenbýrg halyqaralyq kınofestıvalinde kórsetilgen alǵashqy qazaqstandyq fılm. Sonymen qatar, kartına AQSh, Kanada, Reseı jáne Albanııadaǵy festıvalderdiń resmı baǵdarlamalaryna kirdi. Ulttyq kınony qoldaý memlekettik ortalyǵynyń kómegimen túsirilgen fılm otandyq prokatqa kelesi jyldyń basynda shyǵady.

Aıta ketsek, Oldenburg International Film Festival 14-18 qyrkúıek aralyǵynda ótken bolatyn.

Foto: t.me/Madeniet_zhane_sport_ministrligi