Aǵaıyndy Rysqalıevterdiń sybaılasy qamaýǵa alyndy

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi shetelge qashyp ketken aǵaıyndy Rysqalıevterdiń sybaılasy óz kinásin moıyndap kelgenin málimdedi, dep xabarlaıdy QazAqparat tilshisi.

Qoǵammen baılanys departamentiniń dırektory Arman Berdalınniń aıtýynsha, «BNB Contruction» JShS dırektory bıýdjet qarjysyn jymqyrǵany úshin kúdikke ilingen. Osyǵan baılanysty Sybaılas jemqorlyqqa qarsy is-qımyl ulttyq bıýrosynyń Atyraý oblystyq departamenti «BNB Contruction» JShS dırektoryna qatysty qylmystyq isti tergep jatyr.

«Ol Atyraý oblysynyń burynǵy ákimi Bergeı Rysqalıevtiń qylmystyq qoǵamdastyǵy baqylaýyndaǵy tapsyrys berýshiler men merdigerlik jáne ózge de zańdy tulǵalarmen qosalqy merdigerlik kelisimdi rásimdeý arqyly 6,6 mıllıard teńge somasyndaǵy bıýdjet qarajatyn jymqyrdy dep kúdikke ilindi. 2018 jylǵy 4 jeltoqsanda kúdikti kinásin moıyndap keldi. Atyraý oblysynyń qylmystyq ister boıynsha mamandyrylǵan aýdanaralyq sotynyń sheshimimen kúdikti qamaýǵa alyndy. Sotqa deıingi tergeý júrip jatyr. Ózge aqparat tergeý múddesine baılanysty jarııa etilmeıdi», - dedi A.Berdalın Astanada ótken baspasóz máslıxatynda.