Aǵaıyndy Rysqalıevter ulttyq tárbıe joqtyǵynyń jaǵymsyz mysalyna aınalyp otyr - Bashmakov

ASTANA. QazAqparat - Búgin QR Prezıdenti janyndaǵy Memlekettik basqarý akademııasynda birqatar qoǵam qaıratkerleri bılik ókilettilikterin qaıta bólý jáne bıylǵy Joldaý aıasynda dáris oqydy. Lev Gýmılev atyndaǵy Eýrazııa ulttyq ýnıversıteti Qazaqstan xalqy Assambleıasy kafedrasynyń meńgerýshisi Anatolıı Bashmakov óz baıandamasynda aǵaıyndy Rysqalıevterdi ulttyq tárbıeniń joqtyǵynyń jaǵymsyz mysaly retinde keltirdi, dep habarlaıdy QazAqparat tilshisi.

Prezıdenttiń xalyqqa arnaǵan Joldaýyndaǵy adam kapıtalyn damytý máselesi jaıynda aıta kele, ǵalym Bashmakov xalyqtyń rýxanı dúnıetanymyn damytý, ulttyq tárbıeni kúsheıtý problemasyna basa nazar aýdardy.

"Bizge ıntellıgentterdi tárbıeleý kerek. Ondaı tárbıeni joǵary oqý ornynan tappaısyń. Sebebi ondaı qasıet júrek arqyly, Otanǵa degen súıispenshilik sezimimen birge keledi. Týǵan shańyraqta ana sútimen birge darıdy. Adamnyń joǵary bilimi bolýy múmkin. Alaıda ózi alaıaq, jeksuryn bolýy da yqtımal. Endi qarańyzshy, kezinde qazaq jerinde túrme atymen bolmaǵan ǵoı. Adamdy atý, darǵa asý degen túsinikter de bolmady. Týǵan jerden ajyrap, óz rýyńnan alshaq qalsań, odan artyq jaza bolmaıtyn edi. Men ylǵı anaý eki aǵaıyndy qandaı sezimde boldy dep oılaımyn. Bireýi Májilis depýtaty, ekinshisi Atyraý oblysynyń ákimi bolyp júrip, xalyqtyń aqshasyna aýyz salyp, shetelge qashyp ketti. Sóıtip, ekeýi Ulybrıtanııada taırańdap júrgende, týǵan-týystary uıatqa qaldy. Eki ulynyń bezip ketkenine shydaı almaǵan ákesi úsh aıdan keıin qaıtys boldy. Sonda týǵan uldary kelip, bir ýys topyraq sala almady. Ulttyq tárbıeniń joqtyǵynyń eń soraqy mysaly osy bolsa kerek", - dedi eks-depýtat Bashmakov.

Aıta keteıik, búgingi shara "Qoǵamdyq kelisim men jalpyulttyq birlik salasyndaǵy memlekettik saıasat: damýdyń jańa kezeńiniń mindetteri" taqyrybyndaǵy respýblıkalyq semınar-trenıng aıasynda uıymdastyryldy.