Aǵaıyndy Mahmetter Ábý-Dabıde djıý-djıtsýdadan ótken álemdik dodada top jardy

16-28 sáýir aralaǵynda Ábý-Dabı qalasynda (BAÁ) brazılııalyq djıý-djıtsýdan eń bedeldi dodalardyń biri «Abu Dhabi World professional Jiu-jitsu championship 2018» týrnıri ótti. 100-den astam elden jınalǵan úzdik sportshylar óz jas jáne salmaq kórsetkishterinde synǵa túsip, baq synasty. Qazaqstan quramasynyń sapynda Aqmola oblysy atynan aǵaly-qaryndas Ámir jáne Sofııa Mahmet óner kórsetti.

11 jasar Ámir búgingi tańda keýdeni jerden kóterýden KInES Qazaqstan rekordtar kitabynyń bes dúrkin jáne eki dúrkin álem rekordshysy bolyp. Budan bólek, ol «Abu Dhabi World Youth Jiu-jitsu Championship 2017» brazılııalyq djıý-djıtsýdan álem chempıonatynyń qola medal ıegeri, sondaı-aq «Astana open 2017», «Arlan grip selection 2017», «International Almaty Open 2017», «UAEJJF National pro» syndy respýblıkalyq tanymal týrnırlerdiń jeńimpazy ári júldegeri. Sporttaǵy jetistikterimen qatar, Ámir oqýda da úzdik atanyp, aýdandyq jáne respýblıkalyq olımpıadalarda júldeli oryndardy ıelenýde.

«Álem chempıonatyna daıyndyǵymyz qazan aıynan bastaldy. Alaıda jeltoqsan aıynyń orta tusynda Ámir aıaǵynan jaraqattanyp, eki jarym aıdaı jattyǵýyn jalǵastyra almady. Naýryzda ol daıyndyǵyn qaıta bastady. Alǵashynda bul jaı ǵana dene qyzdyrý jattyǵýlary boldy, sebebi múldem álsirep qalǵan edi. Degenmen birtindep, apta saıyn júktemeleri kúsheıe tústi. Nátıjesinde bir jarym aıdyń ishinde anaǵurlym kúsh jınap, sál de bolsa burynǵy qalpyna kele aldy», - deıdi ákesi Anýar Mahmetov.

Densaýlyǵy men daıyndyǵyna baılanysty birqatar qıyndyqtarǵa qaramastan Ámir Álem chempıonaty aıasynda ótkizilgen búkilálemdik festıvalde sátti óner kórsetip, altyn alqa enshiledi.

Ámir birinshi kezdesý barysynda jergilikti balýandy ýaqytynan buryn jeńse, aqtyq synda brıtandyq qarsylasyn aıqyn basymdylyqpen utty.

Ókinishke oraı, Ámirdiń Ábý-Dabıdegi Álem chempıonatyndaǵy óner kórsetýi anaǵurlym sátsiz boldy. Alǵashqy jekpe-jekte Mońǵolııa memleketiniń ókilimen kezdesken ol eki upaı basymdylyǵymen alda bolǵanyna qaramastan, qarsylasy qylqyndyrý ádisin jasaǵan kezde Ámir berilmese de tóreshiniń jekpe-jekti toqtatyp, jeńisti  mońǵolııalyq sportshyǵa berýine baılanysty jeńilis tapty.  

«Ákem atalǵan týrnırden bas tartqysy kelip edi. Biraq óz sheshimin ózgertip, qatysýyma múmkindik berdi jáne buǵan óte qýanyshtymyn. Bul jerde men  naǵyz myqtylar básekesiniń, jeńister men jeńilisterdiń kýási boldym! Bul  jerde biz qomaqty tájirıbe jınaqtap, barymyzdy salyp tek qana alǵa umtylýymyzǵa kúsh beretin zor motıvatsııaǵa ıe boldyq!», - dep alǵan áserlerimen bólisti Ámir Mahmet.

Sondaı-aq, Ábý-Dabıdegi álemdik birinshilikte Qazaqstan quramasynyń qorjynyna alǵashqy bolyp altyn ákelgen Ámirdiń qaryndasy alty jasar Sofııa Mahmetti de atap ótý kerek.  

Eske sala ketsek, atalǵan týrnır jyl saıyn Ábý-Dabıdiń taq murageri hanzada Mohammed bın Zaıedtiń tikeleı qoldaýymen ótkizilip turady.