Aǵaıyndy Klıchkolar týrnırinde Qazaqstan boksshylary 2 «altyn» enshiledi
ASTANA. QazAqparat - Ýkraınanyń Berdıchev qalasynda aǵaıyndy Klıchkolardyń júldesi úshin jasóspirimder arasynda «A» sanatyndaǵy bokstan 18-shi týrnır aıaqtaldy.
Osy baıraqty básekede Qazaqstan boksshylary 2 altyn, 4 qola medal jeńip aldy, dep habarlady QR Boks federatsııasynyń baspasóz qyzmetinen.
Týrnırge 14 eldiń 18-19 jastaǵy 127 bylǵary qolǵap sheberi qatysty. Ýkraınadaǵy jarysqa elimizdiń atynan 10 salmaq sanatynda 11 boksshy qatysty. Nátıjesinde 52 keli salmaq sanatynda Orazbek Asylqulov pen 69 keli salmaq sanatynda Sadrıddın Ahmetov altyn medal ıelendi. Munan bólek, elimizdiń taǵy 4 bylǵary qolǵap sheberi «qolaǵa» qol jetkizdi.
«Balalar jaqsy judyryqtasty. Olardyń ózderi de jattyqtyrýshylary da rıza. Týrnırdi Vıtalıı Klıchko onlaın tamashalap, Qazaqstan komandasyna arnaıy sálem joldady. Ol ár ýaqytta qazaqstandyq boksshylarǵa qurmetpen qaraıdy. Týrnır joǵary deńgeıde ótti, Eýropanyń, Álem chempıondary boldy. Barlyǵy da birinshi quramyn ákeldi. Óıtkeni, Klıchkolar týrnıri álem chempıonaty aldyndaǵy sońǵy synaq retinde qarastyrylady. Biz de óz boksshylarymyzdy baqyladyq, múmkinshilikterin ekshedik. Endi komanda daıyndyqtyń sońǵy kezeńin ótkizedi. Odan keıin 14 qarashada bastalatyn Álem chempıonatyna qatysý úshin Sankt-Peterborǵa attanamyz», - dedi Qazaqstan jastar quramasynyń bas bapkeri Ǵalymbek Kenjebaev.
