Aǵaıyndy Emelıanovtar - Álem chempıondary
ASTANA. QazAqparat - 28-31shilde kúnderi Belarýs respýblıkasynyń astanasy Mınskide, Zaslavldegi esý arnasynda baıdarkada esý jáne kanoe boıynsha jasóspirimder (18 jasqa deıin) jáne jastar (23 jasqa deıin) arasynda álem Chempıonaty ótti. Oǵan álemniń 62 elinen 1300-den astam sportshy qatysty.
Qazaqstandaǵy esý damýynyń tarıhynda alǵash ret shymkenttik eskekshiler: aǵaıyndy Tımofeı jáne Sergeı Emelıanovtar kanoede esý boıynsha, 1000 metrlik qashyqtyqta altyn medal alyp, jastar arasynda (23 jasqa deıin) álem chempıondary atandy. Jáne kanoede sprınterlik 200 metr qashyqtyqta Sergeı Emelıanov qola júldege ıe boldy.
Aǵaıyndy Emelıanovtar QR eńbek sińirgen bapkerleri Jarmenov Denıs pen Strokov Sergeıdiń jetekshiligimen jeke baǵdarlama boıynsha jattyǵady. Jaqynda ǵana Ońtústik Qazaqstan oblysynda ashylǵan, sporttyń esý túrlerine arnalǵan elimizdegi jalǵyz oqý-jattyǵý sporttyq bazasynda daıyndyqtan ótti.
Mınskidegi saıystardyń nátıjesimen birge, Sergeı Emelıanov jasóspirimder jáne jastar arasyndaǵy bes dúrkin álem chempıony atanǵanyn atap ótken jón. Búginde ol Qazaqstannyń ataqty eskekshisi. 2011 jyly Germanııadaǵy jastar álem chempıonatynda (18 jasqa deıin) aǵaıyndylar kanoedegi juptyq jarysta 1000 m, 500 m jáne 200 metr qashyqtyqta qatarynan úsh altyndy jeńip aldy jáne saıys qorytyndysy boıynsha tuńǵysh ret absolıýtti álem chempıondary atandy. 2013 jyly Kanadada ótken jastar álem chempıonatynda Sergeı Emelıanov kanoede 1000 metr qashyqtyqta synǵa túsip, altyn medalǵa jáne 200 metr qashyqtyqta kúmis medalǵa ıe boldy.
Bapkerlerdiń aıtýynsha, aǵaıyndy Emelıanovtarmen josparly jumys júrgizilýde, Tokıo olımpıadasyna qatysý oıda bar. baıdarkada esý jáne kanoe boıynsha ońtústikqazaqstandyq federatsııa birneshe olımpıada chempıondaryn daıyndaǵan jetekshi Polsha mamandarymen kelissózder júrgizdi jáne kelesi jyldan bastap aǵaıyndy Emelıanovtar úzdik mamandarmen birigip jumys isteıdi.
