Aǵaıyndy egizder Ulttyq ulanda áskerı boryshyn birge ótep júr
QR Ulttyq ulanynyń baspasóz qyzmeti málim etkenindeı, egizder – Almaty oblysy Uıǵyr aýdanynyń týmalary.
Zıkırıarovtar áýleti úshin 2003 jylǵy 18 qańtar erekshe qýanyshty kún boldy. Sol kúni egiz ul ómir esigin ashty.
Bir qyzyǵy, Almaty perınataldy ortalyǵynda jeti aılyq bolyp ómirge kelgen shaqalaqtardyń salmaǵy úsh keliden áreń asqan eken, Ramıl 1,450 kg bolsa, Shamıldiń salmaǵy – 1,6 kg. Degenmen olar kishkentaıynan eńbekqor bolyp ósti, kez kelgen jumysty atqarýǵa daıyn turatyn. Segiz jasynan Almaty qalasyndaǵy №151 orta mektebiniń tabaldyryǵyn attaǵan egizder 2019 jyly 9-synyptan keıin osy shahardaǵy avtokólikti jóndeý jáne eksplýatatsııalaý kolledjine 4 jyldyq oqýǵa tústi.
Budan toǵyz aı buryn áskerge shaqyrtylǵan Ramıl men Shamıl bir-birinen ajyrap kórgen emes.
«Kóbi bizdi mektepte te, kolledjde de aıyra almaı, barlyǵy úshin biz «RamSham» atanyp kettik, oǵan esh renjimeımiz. Odan beter bir-birimizge uqsaýǵa tyrysatynbyz», deıdi olar jarysa.
Kishkentaıynan áje tárbıesin kórgen balalar úlkendi syılap, óz eli men jeriniń tarıhyn tanyp, dástúrin saqtaýǵa talpynyp ósken-di. Baýyr dese, ishken asyn jerge qoıatyn olar erekshe tatý. Basqalarǵa da qolushyn sozýǵa ázir turatyn elgezek jastar.
Ramıl men Shamıldiń anasy Arzygúl Asanqyzy: «Túrleri ǵana emes, minez-qylyǵy, sóılegen sózderi, tipti oılaryna deıin birdeı me deıtinbiz. Áıteýir ekeýi árqashan kúlimsirep, jadyrańqy júredi, ómirge óte qushtar», - deıdi uldary týraly.
Qazirgi kezde egizder «Ońtústik» óńirlik qolbasshylyǵyna qarasty 6506-áskerı bóliminiń avtomobıldegi jedel maqsattaǵy batalonynda patrýldik kólik júrgizýshi qyzmetin abyroımen atqarýda.
Sarbazdar arasynda ekeýi de bedeldi. Kez kelgen jerde janyndaǵylarǵa kómek berýge daıyn, berilgen tapsyrmany eki etpeı oryndaıdy. Úsh aıdan soń azamattyq boryshyn óteıtin egizder úılerine oralyp, óz arman-maqsattaryna jetý jolynda eńbektene bermek.
