Aǵaıyndy shahmatshylar Azııa chempıonatynda tórt medal jeńip aldy

20 jasqa deıingi sanatta synǵa túsken Aldııar rapıd pen blıtsten eki altyn medal jeńip aldy. Rapıdte 5,5, al blıtste 7 upaı jınap, qarsylastarynan basym tústi. Klassıkalyq shahmatta 6,5 upaımen tórtinshi orynǵa turaqtady.

12 jasqa deıingi sanatta óner kórsetken Álimjan blıtsten 8 upaımen altyn medal ıelendi. Klassıkalyq shahmatta 7 upaı jınap, kúmis júldege qol jetkizdi.

Bul týraly Aldııar jáne Álimjan Jaýynbaı Jibek Joly telearnasynyń «Búgin.LIVE» baǵdarlamasynda aıtty.

Aǵaıyndy shahmatshylar Aldııar men Álimjan Jaýynbaı Sıngapýrda ótken halyqaralyq týrnırde altyn medal jeńip alýdy maqsat etken. Jarysqa deıin kún saıyn daıyndalǵan.

— Sıngapýrda bári jaqsy ótti. Biz úsh altyn medal jeńip aldyq. Maǵan jarys ta, el de unady. Vetnamdyq shahmatshylar myqty qarsylas boldy. Olar óte jyldam oınaıdy ári jarysqa qatysýshylar sany da kóp boldy, — dedi Álimjan Jaýynbaı.

Aldııar 14 jasta bolǵanyna qaramastan, 20 jasqa deıingi shahmatshylar sanatynda baq synaǵan. Onyń aıtýynsha, qarsylastarynyń basym bóligi ózinen úlken bolǵan.

— Qarsylastarymnyń kóbi menen úlken boldy. Ár oıynshy men úshin ózinshe myqty qarsylas edi. Týrnır aldynda olardyń oıyn stıli men tańdaǵan debıýtterin zertteımin. Shahmatta alǵashqy júristiń ózi mańyzdy. Qarsylastyń stılin aldyn ala bilý oıyn barysynda kómektesedi, — dedi Aldııar.

Aǵaıyndy shahmatshylar jarys kezinde bir-birine qoldaý kórsetip, partııalardy birge taldaıdy eken.

— Partııa aldynda bir-birimizge qoldaý kórsetemiz. «Nátıjege alańdama, oıynǵa kóńil ból» dep jigerlendiremiz. Partııalardy birge qarap, taldaımyz. Keıde oıyn barysynda bir-birimizge keńes beremiz. Mysaly, inim debıýtte qate júris jasasa, men baıqap, qalaı oınaýǵa bolatynyn aıtyp beremin, — dedi Aldııar.

Aǵaıyndylardyń shahmatqa degen qyzyǵýshylyqtary 2020 jyly karantın kezinde bastalǵan.

— Bizge shahmatty ákemiz úıretti. Alǵashynda úıde ermek úshin oınaıtynbyz. Keıin týrnırlerge qatysa bastadyq. Shahmat unap, razrıad alyp, jarystarǵa turaqty túrde qatystyq. Keıin Astanadaǵy Ortalyq shahmat klýbyna bardyq, — dedi Álimjan.

Aldııardyń aıtýynsha, onyń basty maqsaty — 14 jasqa deıin grossmeıster ataný. Ol úshin kóp daıyndalyp, óz partııalaryndaǵy qatelerin taldap, shahmat esepterin kóbirek shyǵarýǵa tyrysady.

— Ol úshin kóp jattyǵý kerek. Partııalarymdy taldap, qatelerimdi túzetýge jáne shahmat esepterin kóp shyǵarýǵa tyrysamyn. Týrnırlerge jıi qatysyp, tájirıbe jınaý da mańyzdy, — dedi ol.

Al Álimjannyń aıtýynsha, shahmatta psıhologııalyq daıyndyq ta mańyzdy.

— Keıde qarsylasyń ádeıi alańdatýǵa tyrysýy múmkin. Ondaı kezde emotsııaǵa berilmeı, tek taqtadaǵy oıynǵa nazar aýdarý kerek. Shahmatta qarsylasty psıhologııalyq turǵyda emes, taqta ústinde jeńý mańyzdy, — dedi ol.

Qazir aǵaıyndylar kún saıyn shahmat klýbynda shamamen eki jarym saǵat jattyǵady. Keshke onlaın shahmat oınap, bos ýaqytynda shahmat esepterin sheshedi. Sonymen qatar dostarymen fýtbol oınap, týystaryna qonaqqa baryp turady.

Shahmat biz úshin tek sport emes, kúndelikti ómirimizdiń bir bóligine aınaldy, — dedi aǵaıyndylar.

Aıta keteıik, segiz jastaǵy qazaqstandyq shahmatshy Ashhabadtaǵy týrnırde chempıon atandy