Aǵaıyndy Sabyrhandar Ispanııadaǵy týrnırde top jardy
ASTANA. KAZINFORM - Ispanııanyń La-Nýsııa qalasynda ótip jatqan Boxam Elite-2026 týrnırinde qazaqstandyq aǵaıyndy boksshylar Mahmud jáne Tórehan Sabyrhandar altyn medal aldy.
El quramasynan aldymen Mahmud Sabyrhan (55 keli) anglııalyq Ellıs Troýbrıdjben sharshy alańǵa shyqty. Jekpe-jek ekinshi raýndta anglııalyq boksshynyń jaraqatyna baılanysty otandasymyzdyń basymdyǵymen aıaqtaldy.
Mahmud Sabyrhan 2001 jyly dúnıege kelgen. Qazirge deıin 2023 jyly álem chempıony bolsa, 2021 jyly kúmis júldeger atandy. 2024 jyly Azııa chempıony ataǵyn jeńip alsa, 2022 jyly qurlyqtyq dodada ekinshi oryn aldy.
Byltyr qyrkúıek aıynda Mahmud Sabyrhan Lıverpýldegi álem birinshiliginiń altyn medalin ıelendi.
Onyń inisi Tórehan Sabyrhan (70 keli) Ispanııadaǵy týrnırde fınalda úndistandyq Dılakpen kezdesken edi. Jekpe-jekte ol tóreshiler sheshimimen 4:1 esebimen jeńiske jetti.
Birinshi raýndta úndistandyq boksshy 5:0 esebimen alda turdy. Qalǵan eki raýndta Tórehan upaı qoryn molaıtyp, jeńis tuǵyryna kóterildi.
Aıta ketsek, byltyr qyrkúıek aıynda ol Anglııanyń Lıverpýl qalasynda World Boxing aıasynda ótip jatqan álem chempıonatynda altyn medalǵa qol jetkizdi.
Taǵy bir otandasymyz Sanjar Tashkenbaı (50 keli) Boxam Elite-2026 týrnırinde fınalda ıspanııalyq Ismael Magraýı Frıany jeńip, chempıon ataǵyn jeńip aldy.
Oǵan deıin el quramasynan Ýmıda Sadyqova (80 keliden joǵary) altyn medal oljalasa, Nazerke Serik (65 keli) pen Panar Seıithanqyzy (80 keliden joǵary) kúmis júldeger atandy.
Elimizdiń erler quramasy úshin halyqaralyq týrnır — Nurjan Nasanovtyń jetekshiligimen ótip jatqan alǵashqy jarys. Ol jyl basynda Qaırat Sátjanovty almastyrǵan edi.