«Agata» tropıkalyq daýylynyń saldarynan 19 adam qurban boldy
ASTANA. Mamyrdyń 31-i. QazAqparat - Ortalyq Amerıka elderine jetken «Agata» tropıkalyq daýylynyń saldarynan eń az degende, 19 adam qurban boldy, dep habarlaıdy «Frans Press» agenttigi Gvatemala men Salvadordyń ókimetine jáne qutqarý qyzmetterine silteme jasap.
«Agata» tropıkalyq daýyly senbi kúni Tynyq muhıtta Gvatemala jaǵalaýynda paıda bolǵan, daýylǵa ilesken jeldiń jyldamdyǵy jeksenbi kúni 80 shaqyrym/saǵatqa deıin jetken.
Jeksenbi kúni Gvatemala prezıdenti Alvaro Kolom, apat saldarynan 13 adamnyń qurban bolǵanyn, olardyń qatarynda 4 balanyń bar ekenin málim etti. Taǵy 24 adam iz-túzsiz joǵalǵandar sanatynda. Ókimet eldiń 74,5 myńǵa jýyq turǵynyn qaýipsiz jerge kóshirip otyr.
Al Salvadorda tabıǵat apaty 6 adamnyń ómirin qıǵan, eki adam iz-túzsiz joǵalyp ketken.
Gondýrastyń tIEMPO gazetiniń saıtynda jarııalanǵandaı, Meksıkanyń ońtústik-shyǵysynda qaýip-qaterdiń joǵary deńgeıi jarııalanyp otyr. Al Gvatemalamen shekaralas Chıapas shtatynda halyqqa daýyldyń kele jatqany týraly eskertý jasaldy.
Degenmen, AQSh-tyń Muhıttaný jáne atmosfera boıynsha ulttyq basqarmasynyń mamandary, 2010 jyly Tynyq muhıttaǵy daýyldar maýsymy ádettegiden tynyshtaý bolatynyn boljap otyr.
