Aǵashtardy zańsyz kesken semeılik kásipkerge aıyppul salyndy
SEMEI. QazAqparat - Semeıde zańsyz aǵash kesken kásipkerge aıyppul salyndy, dep habarlaıdy QazAqparat.
Kásipker Sh. Qarjaýbaıuly kóshesinde jol jıeginde ósip turǵan kóp jyldyq aǵashtardy zańsyz kesken. Onyń bul áreketi áleýmettik jeligi taraǵan beınejazbadan keıin belgili boldy. Qala turǵyny aǵashtardy kesip, «KamAZ» kóligine tıep jatqandardy beınejazbaǵa túsirip alǵan.
«Mine, «Aprel» dúkeni, «Keń Dala» qonaqúıiniń mańaıy. Qaıyń aǵashtaryn kesip jatyr. Jaı qalyp ósip turǵan, shirimegen aǵashtardy qalaı kesip jatyr?» degen qala turǵyny óz jazbasynda.
Osydan keıin jergilikti bılik mán-jaıdy tekserýge kirisken. Keıin belgili bolnaǵyndaı, aǵashtardy kesýge «Keń dala» kesheniniń qojaıyny tapsyrys beripti. Kez kelgen aǵashty kesý úshin aldymen quzyrly organǵan ótinish ótkizip, ruqsat alý qajet. Alaıda kásipker quzyrly mekemelerden ruqsat almaǵan.
«Semeı qalasynyń tabıǵatty qorǵaý polıtsııa bólimi atalǵan aýmaqtaǵy aǵashtardy kesýge ruqsat berilmegenin anyqtady. Kásipkerge Ákimshilik quqyq buzýshylyq týraly kodekstiń 505-baby ıaǵnı, qalalar men eldi mekenderdiń aýmaqtaryn abattandyrý qaǵıdalaryn buzý, sondaı-aq qalalar men eldi mekenderdiń ınfraqurylymy obektilerin buzý, jasyl jelekti joıý jáne búldirý
baby boıynsha 30AEK (72 150 teńge) aıyppul salyndy», - dedi Semeı qalalyq Іshki saıasat bóliminiń jetekshisi Nurjan Esenjolov.
