Aǵashsyz kóshe: ákimdik jańa jobalarǵa qatysty túsinikteme berdi
ALMATY. QazAqparat - Almaty ákimdigi kóshelerdi qaıta jasaý josparynda nege otyrǵyzylǵan aǵashtar qarastyrylmaǵanyn túsindirdi, dep habarlaıdy QazAqparat tilshisi.
Aqpan aıynyń basynda qalalyq Sáýlet jáne qala qurylysy basqarmasy Abaı, Abylaı han, Nazarbaev kósheleriniń qaıta jóndeý jobasyn kópshilik talqylaýyna shyǵarǵan bolatyn.
Talqylaýǵa qatysqan qala turǵyndary kóshelerdiń boıynda aǵashtardyń joqtyǵyna tańdanys bildirgen bolatyn.
«Jarııalanǵan qaıta jóndeý jobalary tek qana ǵımarattardyń qasbetine ǵana qatysty. Bul jasyl jelek otyrǵyzý tujyrymdamasyna qatysy joq. Bolashaqta osy kóshelerdiń dendrojospary kórsetiletin bolady. Sonymen qatar, qazir kóshelerdegi jasyl-jelek sol kúıinde saqtalady», - dedi qala ákimdiginen.
Aıta ketý kerek, tanystyrylǵan jobalar boıynsha aqpan aıynyń sońynda qoǵamdyq tyńdaý ótpek.
