Aǵash japyraǵy shuryq tesik: Aqtóbe qalasynda bıyl jándikterdi ýlamady
AQTÓBE. KAZINFORM — Aqtóbe qalasynda aǵashtar shuryq tesik kúıge túsken. Bıyl oblys ortalyǵynda múlde ýlaý jumysy júrgizilmedi.
Aqtóbe qalasy kóshelerindegi aǵashtardyń japyraǵyn qurt jep ketken. Shuryq tesik bolǵan japyraqtar sarǵaıyp, túse bastady.
Búginde Aqtóbe qalasy Astana jáne Almaty aýdandaryndaǵy ákimdikter memlekettik konkýrs ótkenimen qatysýshylar bir-birine shaǵym túsirip, ýaqyt ozdyryp alǵan.
Saldarynan aǵashtar jaramsyz kúıge tústi.
— Áli kúnge deıin memlekettik satyp alý konkýrs júrip jatyr. Ekinshi ret konkýrs ótti. Birinshisi mamyr aıynda ótip, konkýrsqa qatysýshylar bir-birine shaǵym túsirdi. Ekinshi ret maýsym aıynda ótip edi. Sonyń merziminiń aıaqtalǵanyn kútip otyrmyz. Talap boıynsha osy ýaqyt aralyǵynda eshqandaı shaǵym bolmaýy tıis. Eger jeńimpaz naqtylansa, ýlaý jumysyn jasaǵymyz da keledi. Sebebi aǵash japyraqtaryn qurt jep tastap jatyr. Jańbyrdan keıin sarǵaıyp ta ketti. Bıyl múlde ýlaý júrmedi. Tek masa men qoqys alańdarynda tyshqan men egeýquıryqqa qarsy ýlaý jumysy atqaryldy, — dedi Aqtóbe qalasy Astana aýdany turǵyn úı-kommýnaldyq sharýashylyq bóliminiń basshysy Mıras Ájibaev.
Onyń aıtýynsha, tamyz aıynyń basynda bul jumysty bastaýǵa bolady. Keler jyly japyraq kemirgish qurttardan keler zııan azaıady.
Al tamyz aıynyń sońynda naqtylansa, ol tıimdi bolmaıdy. Astana aýdany boıynsha 40 mln teńge usynyldy.
Ázirge jeńimpazdyń bul jumysqa qansha qarjy jumsaıtyny belgisiz. Sonymen birge Almaty aýdany boıynsha da ýlaý jumysy júrgizilmedi.
— Bıyl aǵash japyraqtaryn ýlaý jumysy atqarylmady. Qańtardan bastap búginge deıin konkýrs ótip jatyr. Qaıta konkýrs jarııalap qoıdyq. Ózim júrgen saıyn japyraqtardy talap ketpese eken dep qarap qoıamyn. Negizi masa, kemirgish jándikten zararsyzdandyrý, deratızatsııa jasaldy. Tek aǵash japyraǵyna úsh ret konkýrs ótkizip, tórtinshisi qaıta jarııalandy. Endi onyń tıimdiligi bolmas dep otyrmyn. Birinshisinde qatysýshy bolmady, ekinshisinde bir-birine shaǵym túsirdi. Aýa raıy da qarasyp, jaz qatty ystyq bolmady, — dedi Aqtóbe qalasy Almaty aýdanynyń ákimi Aslanbek Shúıinshalıev.
Almaty aýdany boıynsha 45 mln teńge qarastyrylǵan.
