Aǵash ústine qulap jaraqattanǵan stýdentke oqý orny kómek beredi
ASTANA. QazAqparat - Ál-Farabı atyndaǵy Qazaq ulttyq ýnıversıtetiniń stýdenti Móldir Erjanova aıaldamada turǵan kezde ústinde aǵash qulap, jaraqattandy.
Dárigerlerdiń aıtýynsha, naýqastyń jaǵdaıy aýyr.
«Shuǵyl kómek kórsetý máselesi sheshilýde. Bizdiń mamandar jaǵdaıyn qarap, ómirlik kórsetkishterine monıtorıng jasaıtyn bolady. Osydan keıin ota jasaý qajet pe álde emdeýge bola ma degen másele anyqtalady», - dedi №7 qalalyq klınıkalyq aýrýhananyń №2 neırohırýrgııa bólimshesiniń meńgerýshisi Eldar Qurmanov.
QazUÝ baspasóz qyzmeti jaraqat alǵan stýdentke joǵary oqý orny tarabynan qajetti barlyq kómek kórsetiletindigin atap ótti.
«QazUI basshylyǵy bul oqıǵa jaıynda biledi. Bul keleńsiz jaıt QazUÝ aýmaǵynda oryn alǵan joq. Degenmen, joǵary oqý orny tarabynan kómek kórsetiledi», - dep habarlady baspasóz qyzmetinen.
Bostandyq aýdandyq ákimdigi apparaty abattandyrý bóliminiń jetekshisi Renat Seıdiramanov qulaǵan aǵashtyń saý bolǵanyn aıtýda. «Aǵash ta, onyń butaǵy da jasyl, saý. Saý butaq synyp qulaǵan, sebebi túsiniksiz. Bul tabıǵı qubylys. Sondyqtan bireý kináli dep aıta almaımyz. Al qyzǵa kómek kórsetile me, kórsetilmeı me bilmeımin» - dedi ol.
