Tórehan Sabyrhan: Aǵalar jolymen Qazaq boks stılin pash etý – basty maqsatym
NIShIO.KAZINFORM — Qazaqstan quramasy araǵa 12 jyl salyp jazǵy Azııa oıyndarynda bokstan altyn medal jeńip aldy. Japonııada ótip jatqan HH Azııa oıyndarynda Tórehan Sabyrhan 70 keli salmaqta top jaryp, el qorjynyna onynshy altyn júldeni syılady.
Aqtyq synda sharshy alańda atoı salǵan otandasymyz jekpe-jekten keıin Kazinform tilshisine shaǵyn suhbat berip, Azıadany qortyndylady.
Boksshynyń aıtýynsha, fınaldyq aıqasta bapkerlerdiń taktıkasy óz nátıjesin bergen.
— Aqtyq aıqasymda bapkerlerimniń taktıkasyn keremet oryndap shyqtym. Biz eldegi daıyndyq barysynda ıordanııalyq boksshyǵa qarsy shyǵatynymyzdy kútip, taktıkalyq turǵydan daıyn júrdik. Ótken qatelikterimnen sabaq alyp, qarsylasyma alǵa umtylmaı, ony óz «qaqpanyma» túsirip otyrdym. Alǵashqy raýndtan bastap basymdyqty bermeı, sońǵy raýndta ózimdi dáleldeý úshin shabýyldy kúsheıttim, — dedi ol.
Sabyrhan sonymen qatar ıordanııalyq qarsylasymen fınalda kezdesýdi kútkenin, ótken Azııa chempıonatyndaǵy esesin qaıtarǵanyn aıtty.
— Qazaq jankúıerleri meniń Azııa chempıonatyndaǵy jeńilisimnen keıin qatty renjidi. Jalpy, qarsylas osal boksshy emes. Osyǵan deıin Aslan Shymbergenov jáne Abylaıhan Júsipov sııaqty boksshylarmen qolǵap túıistirgen, eresekter arasynda tájirıbeli boksshy. Ótken aıqasymda qyzbalyqqa salynyp kóp qatelikter jiberdim. Sol úshin osy fınalda onymen qaıta judyryqtasýdy asyǵa kúttim. Iá, osy joly men esemdi qaıtardym, — dedi boksshy.
Sonymen qatar, sportshy jartylaı fınaldaǵy ózbek boksshysy týraly pikir bildirdi.
— Biz bir-birimizdi jaqsy bilemiz, kóptegen baıraqty dodalarda kezdestik. Ol menimen qurdas. Sol sebepti ómirde jaqsy tanyspyz. Alaıda rıngte aǵa-baýyr bolmaıdy, barlyǵy tek jeńis úshin alǵa umtylady. Jaqsy jekpe-jek kórsettik dep oılaımyn. Aıqastan keıin bir-birimizge qurmet bildirip, quttyqtadyq, — dedi boksshy.
Tórehan aldaǵy josparlary týraly aıta kele, aǵalar jolymen Qazaq boks stılin pash etý basty maqsaty ekenin jetkizdi.
— Qarsylastaryma Qazaq boks mektebi qandaı ekenin kórsetip, Serik Sápıev, Danııar Eleýsinov aǵalarym sııaqty Qazaq boks stılin pash etkim keledi, — dedi ol.
Sóz sońynda, Tórehan Sabyrhan barlyq qoldaý kórsetken qazaqstandyqtarǵa alǵys aıtyp, aldaǵy halqaralyq dodalarda el namysyn abyroımen qorǵaıtynyn jetkizdi.
Eske salaıyq, Tórehan Sabyrhan búgin Japonııada bokstan Azııa oıyndarynyń altyn medalin jeńip aldy.
Osyǵan deıin habarlaǵanymyzdaı, qazaqstandyq boksshy Aıbek Oralbaı Azııa oıyndary fınalynda synǵa túsedi.
