Afrıkanyń ońtústiginde myńdaǵan turǵyn kóteriliske shyqty
NUR-SULTAN. QazAqparat - Afrıkanyń ońtústiginde myńdaǵan turǵyn kóteriliske shyqty. Áıelderdi qatygezdikpen zorlaǵan soń, ashýǵa býlyqqan myńdaǵan turǵyn kóteriliske shyqty. Olar Úkimettiń názik jandylar quqyǵyn qorǵaı almaǵanyna narazy, dep habarlaıdy The Guardian.
Ońtústik Afrıka qoǵamdyq birlestiginiń barlyq áıel ókilderi Keıptaýndaǵy parlamentke qaraı sherýge shyqty. Olar tamyz aıynda zorlyq-zombylyqtan qaza tapqan áıelderdi eske alyp, qara tústi kıim kııýge májbúr boldy. Sherý birneshe kúnge sozylyp, basylar emes.
Resmı málimet boıynsha, Ońtústik Afrıkada kúnine keminde 137 zorlyq áreketi tirkeledi. Árıne, onyń basym kópshiligi názik jandylardyń namysyn aıaqqa taptaýǵa qatysty. Áıelder isi jónindegi mınıstr Nkoana-Mashabane tamyz aıynda 30 áıel óz kúıeýiniń qurbany bolyp, qaza tapqanyn aıtty.
Myńdaǵan kóterilisshi áıeldi jergilikti tanymal jandar da qoldady. Olar prezıdent Sırıl Ramafostan zorlyq-zombylyqtyń jazasyn kúsheıtýdi, áıelderdi qorǵaýdy suraýda.
Eske sala keteıik, Ońtústik Afrıkada tamyz aıynda áıelderge qatysty birneshe zorlyq-zombylyq oqıǵasy tirkeldi. 26 jasar aıaǵy aýyr Saadıka Nıýman 8 jerinen oq tıip kóz jumǵan jerinen tabyldy. Odan keıin Denýsha Vıtbýı óz kóliginde, al Megan Kremer shahtada zorlanyp, qaıtys bolǵan. 6 jasar Natalıa Pıenaardyń basyna belgisiz bireýler oq atqan. Lınett Volshenk esimdi qyzdy óz páterinde kórshisi zorlap óltirgen. Bokstan el chempıony Leıgandr Djegelsti polıtsııa qyzmetkeri, óziniń dosy atyp tastaǵan. 19 jasar stýdent Ýınene Mrvetıan 24 tamyzda poshtadan joldama alýǵa baryp, joǵalyp ketken. Birneshe kúnnen keıin denesi tabyldy. Ony poshta qyzmetkerleri zorlap, uryp óltirgenderin moıyndady.
