Afrıkanyń eń uzyn tasjoly Tramp qurmetine ataldy
ASTANA. KAZINFORM — Bul sheshim Amerıka kóshbasshysyna Batys Sahara máselesindegi ustanymy úshin alǵys bildirý belgisi boldy, dep Kazinform agenttiginiń Taıaý Shyǵystaǵy menshikti tilshisi.
Marokko bıligi eldiń eń iri tasjoldardyń birine AQSh prezıdenti Donald Tramptyń esimin berý týraly sheshim qabyldady. Bul týraly Marokkonyń MAP aqparat agenttigine silteme jasaı otyryp Asharq Al-Awsat basylymy habarlady.
Tıznıt pen Dahla qalalaryn jalǵaıtyn tasjolǵa Donald J. Trump Highway ataýy berildi. Sheshim týraly Marokko koroli Muhammed VI jarııalap, bul Amerıka kóshbasshysyna 2020 jyly Batys Saharadaǵy Marokkonyń egemendigin moıyndaǵany úshin alǵys bildirý belgisi ekenin atap ótti.
Marokko patshasy Donald Trampqa joldaǵan hatynda bul sheshimniń «jeke rızashylyǵyn» bildiretinin jáne eki el arasyndaǵy dostyq pen beıbitshilik qundylyqtaryn kórsetetinin málimdedi.
— Sizdiń 2020 jyly Marokkonyń Saharadaǵy egemendigin tarıhı túrde moıyndaýyńyz marokkalyqtardyń esinde máńgi saqtalady, — delingen patshanyń hatynda.
MAP málimetinshe, tasjoldyń uzyndyǵy — 1055 shaqyrym, bul ony Afrıkadaǵy eń iri jol ınfraqurylymy jobasyna aınaldyryp otyr. Joba Marokkonyń ońtústigin ál-Aıýn arqyly Dahlamen baılanystyrady jáne Rabattyń ońtústik aýmaqtarmen jáne Batys Afrıka elderimen kólik baılanystaryn damytýǵa baǵyttalǵan ınfraqurylymdyq baǵdarlamasynyń bóligi. Jobanyń quny shamamen 850 mln eýroǵa baǵalandy.
2020 jyldyń jeltoqsanynda Donald Tramp ákimshiligi Marokkonyń Batys Saharadaǵy egemendigin moıyndady. Rabat sonymen qatar AQSh deldaldyǵymen jasalǵan kelisimder aıasynda Izraılmen qarym-qatynasyn qalypqa keltirdi.
Keıin Tramp Marokkonyń aımaqtyq avtonomııa josparyn qoldaıtynyn taǵy da rastap, Marokko koroline tasjolǵa onyń esimin bergeni úshin alǵys aıtty.
Batys Sahara Marokko men POLISARIO maıdany arasyndaǵy uzaq ýaqytqa sozylǵan daýdyń taqyryby bolyp qalyp otyr. Marokko aımaqtyń kóp bóligin baqylaıdy jáne ony óziniń ońtústik provıntsııalary dep sanaıdy. POLISARIO maıdany Aljırdiń qoldaýymen táýelsiz memleket qurýdy jaqtap otyr. BUU Batys Saharany ózin-ózi basqarmaıtyn aýmaq retinde jikteıdi.
Osyǵan deıin Ispanııa Marokkomen shekarada jańa bóget ornatýǵa kiriskenin jazdyq.
Qasym-Jomart Toqaev Korol VI Muhammed pen onyń otandastaryn Marokko Koroldiginiń tól merekesi — Taqqa otyrǵan kúnimen quttyqtady.
