Afrıkadaǵy qurǵaqshylyq: klımattyń ózgerýi 120 mıllıonǵa jýyq adamnyń ómirine qaýip tóndirdi
ASTANA. KAZINFORM – Tıisti sharalar qabyldanbasa, 2030 jylǵa qaraı Afrıkada 118 mıllıonǵa jýyq kedeı halyq qurǵaqshylyq, sý tasqyny jáne aptap ystyqtan zardap shegedi, dep habarlady Dúnıejúzilik meteorologııalyq uıym.
Dúnıejúzilik meteorologııalyq uıym (BUU-nyń mamandandyrylǵan mekemesi) kontınenttegi klımattyq jaǵdaı týraly («Afrıkadaǵy klımat jaǵdaıy 2023») baıandamasyn jarııalady, onda klımattyń ózgerýi Afrıkadaǵy 120 mıllıonǵa jýyq adamǵa qaýip tóndiretini atalyp ótedi.
Baıandamaǵa sáıkes, Afrıka klımat ózgerisiniń aýyrtpalyǵyn jáne qajetti beıimdelýdiń proportsıonaldy emes shyǵyndaryn ótkerip jatyr. 2030 jylǵa qaraı Afrıkadaǵy 118 mıllıonǵa jýyq kedeı halyq tıisti sharalar qabyldanbasa, qurǵaqshylyqtan, sý tasqynynan jáne qatty ystyqtan zardap shegedi.
Orta eseppen Afrıka elderi JІÓ-niń 2-5%-yn joǵaltady, al olardyń kópshiligi óz bıýdjetteriniń 9%-ǵa deıinin tótenshe klımattyq qubylystarmen kúresýge arnaıdy. Alaıda Saharanyń ońtústigindegi Afrıkada beıimdelý quny aldaǵy onjyldyqta jylyna 30-50 mıllıard dollarǵa baǵalanady.
Aýa raıy uıymy Afrıka elderi ulttyq meteorologııalyq jáne gıdrologııalyq qyzmetterge ulǵaıtylǵan ınvestıtsııaǵa basymdyq berýi kerek jáne «Barshaǵa arnalǵan eskertýler» bastamasyn júzege asyrýdy jedeldetý kerek deıdi.
Dúnıejúzilik meteorologııalyq uıymnyń bas hatshysy Selesta Saýlo sońǵy 60 jylda Afrıkadaǵy jylyný úrdisi álemdik deńgeıden áldeqaıda jyldam júrip jatqanyn atap ótti.
«2023 jyly kontınent adam ólimine ákep soǵatyn ystyq tolqyndar, nóser jaýyn, sý tasqyndary, tropıkalyq tsıklondar jáne uzaqqa sozylǵan qurǵaqshylyqty bastan ótkerdi», - dedi ol.
