Afrıkadaǵy Ebola indetinen kóz jumǵandar sany myńnan asty
ASTANA. KAZINFORM — Afrıkada Ebola indetinen myńnan astam adam kóz jumdy. Bul týraly Kongo Demokratııalyq Respýblıkasy men Ýgandanyń densaýlyq saqtaý organdary jarııalady, dep habarlaıdy Sınhýa.
Kongo Densaýlyq saqtaý mınıstrliginiń 23 shildede jarııalaǵan epıdemıologııalyq jaǵdaı týraly esebine sáıkes, 20 shildedegi jaǵdaı boıynsha elde Ebola juqtyrýdyń 2473 rastalǵan jaǵdaıy tirkelgen. Onyń ishinde 999 adam syrqattan qaıtys boldy.
Ýgandada 20 jaǵdaı rastalyp, eki adam kóz jumǵan. Osylaısha, indetten zardap shekken eki eldegi jalpy qaıtys bolǵandardyń sany — 1001.
Ebola vırýsynyń Býndıbýgıo shtamynan týyndaǵan indet týraly alǵash ret 15 mamyrda KDR-dyń shyǵysyndaǵy Itýrı provıntsııasynda habarlanǵan. Keıin aýrý Soltústik Kıvý, Ońtústik Kıvý, Joǵarǵy Ýele jáne Chopo provıntsııalaryna tarady.
KDR Densaýlyq saqtaý mınıstrliginiń málimetinshe, 20 shildedegi jaǵdaı boıynsha 737 naýqas oqshaýlanǵan nemese aýrýhanalarda em qabyldap jatyr. Al 482 adam dertten aıyqqan.
Buǵan deıin Dúnıejúzilik densaýlyq saqtaý uıymy Kongodaǵy Ebola indetiniń naqty aýqymy resmı kórsetkishten 2-4 ese joǵary bolýy múmkin ekenin málimdegen bolatyn.
