Afrıkadaǵy Ebola indeti jańa jahandyq pandemııa aldyndaǵy eskertý bolýy múmkin
ASTANA. KAZINFORM – Kongo Demokratııalyq Respýblıkasyndaǵy Ebola bezgeginiń órshýi jahandyq densaýlyq saqtaý júıesiniń álsireýiniń saldary týraly búkil álemge eskertý bolýy múmkin, dep habarlaıdy Financial Times.
Mundaı pikirdi halyqaralyq sarapshylar aýrý juqtyrǵandar sanynyń artýyna jáne qaýipti ınfektsııalarmen kúres baǵdarlamalaryn qarjylandyrýdyń qysqarýyna qarata aıtty.
Mamandardyń pikirinshe, qazirgi jaǵdaı COVID-19 pandemııasynan keıin epıdemııalarǵa qarsy áreket etýdiń álemdik júıesi qanshalyqty osal bolyp qalǵanyn kórsetedi.
Halyqaralyq qatynastar jónindegi keńestiń jahandyq densaýlyq saqtaý baǵdarlamasynyń dırektory Tomas Bollıkı indet halyqaralyq densaýlyq saqtaý júıesindegi eleýli ózgerister jaǵdaıynda órship jatqanyn aıtty.
Onyń sózinshe, ǵalymdar men dárigerlerde mundaı qaýiptermen kúresýge jetkilikti bilim bar, alaıda qoldaý kórsetetin uıymdar men tetikter birneshe jyl burynǵyǵa qaraǵanda áldeqaıda álsiz.
Sarapshy koronavırýs pandemııasynan keıin qoǵamdyq jáne jahandyq densaýlyq saqtaý salasyna degen kózqaras aıtarlyqtaı nasharlaǵanyn atap ótti. Onyń baǵalaýynsha, álemge qaýipti aýrýlarmen kúrestegi halyqaralyq yntymaqtastyqtyń tabysty mysaldary burynǵydan da qajet.
Osyǵan uqsas pikirdi 1976 jyly Ebola vırýsyn ashýǵa qatysqan belgııalyq mıkrobıolog Pıter Pıot ta bildirdi. Ol jahandyq pandemııanyń aldyn alýdyń eń tıimdi joly – aýrýdyń taralýyn erte kezeńde toqtatý ekenin aıtty.
Ǵalymnyń sózinshe, bolashaq epıdemııalarǵa daıyndyqqa baǵyttalǵan ınvestıtsııalar birtindep qysqaryp keledi. Ol mundaı jaǵdaıdy dál qazir órt joq eken dep órt sóndirý qyzmetin taratyp jiberýmen birdeı ekenin aıtty.
Kongo Demokratııalyq Respýblıkasynyń bıligi Ebola indetiniń órshýi týraly 15 mamyrda jarııalady. Sol kúni Ýgandada da aýrýdyń syrttan ákelingen jaǵdaıy rastaldy.
17 mamyrda Dúnıejúzilik densaýlyq saqtaý uıymy Kongo Demokratııalyq Respýblıkasy men Ýgandaǵy jaǵdaıdy halyqaralyq mańyzy bar qoǵamdyq densaýlyq saqtaý salasyndaǵy tótenshe jaǵdaı dep tanydy.
KDR Baılanys jáne BAQ mınıstrliginiń sońǵy derekterine sáıkes, Ebola bezgeginen qaıtys bolǵandar sany 181 adamǵa jetti. Al rastalǵan aýrý jaǵdaılarynyń sany 710-dy quraıdy.
Aıta keteıik, Kongo Demokratııalyq Respýblıkasynda Ebola bezgeginiń órshýi 29 medıtsınalyq aımaqqa áser etkenin jazdyq.
