Afrıkada pasporttary tárkilengen qazaqstandyqtar elge qaıtaryldy

ASTANA. KAZINFORM – Syrtqy ister mınıstrliginiń resmı ókili Aıbek Smadııarov kezekti brıfıngte Afrıkada pasporttary tárkilengen qazaqstandyqtar elge qalaı qaıtarylǵanyn aıtty.

«Osydan birneshe apta buryn Nıger astanasy Nıameıde Qazaqstannyń 2 azamaty ustaldy degen aqparat tústi. Qazaqstannyń Mysyrdaǵy konsýlymyz dereý sol qalaǵa ushyp bardy. Ol Nıgerdiń Syrtqy ister jáne ishki ister mınıstrlikteriniń, Qarýly Kúshteri bas shtabynyń basshylyǵymen kezdesýler ótkizdi. Kezdesý barysynda Qazaqstan tarapy «Bizdiń azamattardy dereý jiberý, pasporttaryn qaıtarsyn» dep talap qoıǵan. Árıne, ol elge qandaı maqsatta barǵanyn, ne úshin pasport alǵanyn ne sol eldiń bıligi, ne bizdiń azamattar túsinbegen. Biraq osyǵan qaramastan Qazaqstan resmı túrde sol eldiń bıligine nota jiberdi», - dedi SІM resmı ókili jýrnalıstiń suraǵyna bergen jaýabynda.

Onyń sózinshe, atalmysh istiń rettelýine atalmysh eldiń syrtqy ister vedomstvosy da atsalysqan.

«Nıger Syrtqy ister mınıstrliginiń kómegimen bizdiń azamattardyń tólqujattary qaıtaryldy. Bıyl 26 aqpanda olar Qazaqstanǵa oraldy», - dedi Aıbek Smadııarov.

Eske salsaq, Aıbek Smadııarov buǵan deıin de tólqujatyn Nıger áskerıleri tárkilegen qazaqstandyqtar týraly pikir bildirgen bolatyn.