Afrıkada mpoh vırýsyna kúdikti 35 myńnan astam jaǵdaı anyqtaldy

ASTANA. KAZINFORM – Afrıkada 2024 jyldyń 1 qańtary men 29 qyrkúıegi aralyǵynda mpox (maımyl shesheginiń jańa ataýy) vırýsyn juqtyrýdyń 35 myńnan astam kúdikti jaǵdaıy jáne osy aýrýdan bolýy múmkin myńǵa jýyq ólim jaǵdaıy anyqtaldy, dep habarlaıdy TASS aqparat agenttigi.

Dúnıejúzilik densaýlyq saqtaý uıymynyń (DDU) habarlaýynsha, jyl basynan beri Afrıkadan mpox vırýsyn juqtyrýdyń 35 525 kúdikti jaǵdaıy tirkelgen, sonyń ishinde 996 adam qaıtys boldy, dep habarlady DDU aqparattyq bıýlleteninde. 23-29 qyrkúıek aralyǵyndaǵy bir aptada ınfektsııa juqtyrǵandar sany 4098-ge, al qaıtys bolǵandar sany 156 adamǵa ósti.

Jyl basynan beri dárigerler Kongo Demokratııalyq Respýblıkasynda (KDR) maımyl sheshegine shaldyqan 30,766 jáne odan qaıtys bolǵan 990 jaǵdaıyn anyqtady. Ekinshi orynda Býrýndı tur, onda jyl basynan beri 1368 adam maımyl sheshegi vırýsyn juqtyrdy degen kúdikke ilindi. Bul elde ólim-jitim tirkelgen joq.

Mpox vırýsyna baılanysty dúnıejúzilik densaýlyq saqtaý salasyndaǵy tótenshe jaǵdaı bastapqyda 2022 jyldyń shildesinen 2023 jyldyń 11 mamyryna deıin kúshinde boldy. Aýrýǵa shaldyǵý jaǵdaılarynyń azaıýyna baılanysty ol toqtatyldy, biraq bıylǵy jyldyń 14 tamyzynda DDU basshysy Tedros Adhanom Gebreıesýs Afrıkadaǵy aýrýdyń órshýine baılanysty taǵy da tótenshe jaǵdaı jarııalady.

Mpox – negizinen tropıkalyq ormandarǵa jaqyn ortalyq jáne batys Afrıkanyń shalǵaı aýdandarynda paıda bolatyn vırýstyq aýrý. Bul aýrýdy janýardan adamǵa juqtyrýdyń alǵashqy oqıǵasy 1970 jyly Kongo Demokratııalyq Respýblıkasynda tirkelgen.

Kazinform úshin arnay TASS seriktes agenttigi usynǵan.