Afrıkada qazaq kúresinen birinshilik ótedi
ASTANA. QazAqparat - Ońtústik Afrıka Respýblıkasynyń Keıptaýn qalasynda 18-19 mamyr kúnderi qazaq kúresinen qurlyqtyq chempıonat ótedi, dep habarlaıdy QazAqparat tilshisi.
Bul týraly Dúnıejúzilik qazaq kúresi federatsııasy málim etti. Osymen ekinshi márte uıymdastyrylǵaly otyrǵan dodaǵa álemniń 15 elinen jınalǵan balýandar úsh salmaq (70, 80, +80 kg) dárejesi boıynsha kúsh synasady.
Bıylǵy chempıonatta tóreshilerge arnalǵan semınar da bolady. Dúnıejúzilik qazaq kúresi federatsııasynyń birinshi vıtse-prezıdenti Serik Tókeevtiń aıtýynsha, jıynda uıymnyń tóreshileri afrıkalyqtarǵa tól kúresimizdiń erejelerin úıretip, tájirıbelerimen bólisedi.
Sondaı-aq, Serik Tókeev: «Jaqyn kúnderi Afrıkada ulttyq kúresimizden qurlyqtyq chempıonat ótkizemiz. Bul - Dúnıejúzilik qazaq kúresi federatsııasynyń Keıptaýnda ekinshi ret uıymdastyryp jatqan jarysy. Birinshi chempıonat eresekter arasynda 2013 jyldyń 26 aqpan men 3 naýryz aralyǵynda bolǵan edi. Sol kezde jarysqa Ońtústik Afrıka Respýblıkasy, Zımbabve, Botsvana, Svazılend, Gabon men Nıgerııa memleketteriniń balýandary qatysqan. Al bıylǵy dodada 6 emes, endi 15 eldiń ókilderi baq synasady. Onyń taǵy bir ereksheligi, chempıonat erler jáne áıelder arasynda ótedi. Jańa aıtqan elderdiń sportshylary jarysqa taǵy da qatysamyz dep belin býyp otyr. Odan basqa Seıshel araldary, Mavrıkıı, Kongo Demokratııalyq Respýblıkasy, Benın, Malavı, Namıbııa, Ýganda men Ońtústik Afrıka Respýblıkasynyń Goteng, Shyǵys Keıp, Soltústik Keıp jáne Batys Keıp provıntsııalary jeke komanda bolyp qatysady», - dep atap ótti.
