Afrıkada Ebola vırýsy órship barady: 10 elge qaýip tónip tur
ASTANA. KAZINFORM — Afrıkada Ebola vırýsynyń taralýy kúsheıip keledi. Eń kúrdeli jaǵdaı Kongo demokratııalyq respýblıkasynda tirkelip otyr. Bılik naýqastar men kóz jumǵandar sanynyń kúrt artqanyn málimdedi, dep habarlaıdy BILD.
Afrıka odaǵy densaýlyq saqtaý organdary Ebola vırýsynyń taralý qaýpi óńirdegi keminde on el úshin saqtalyp otyrǵanyn eskertti.
Kongo úkimetiniń málimetinshe, eldiń shyǵys bóliginde Ebola vırýsyn juqtyrdy degen kúdikpen 867 jaǵdaı tirkelgen.
Kóz jumǵandar sany 204 adamǵa jetken.
Infektsııanyń taralý qaýpi Ońtústik Sýdan, Rýanda, Kenııa, Tanzanııa, Efıopııa, Býrýndı, Angola, Ortalyq Afrıka respýblıkasy men Zambııa memleketterine tónip tur.
Mamandar qazirgi indettiń sırek kezdesetin Býndıbýgıo shtamymen baılanysty ekenin aıtyp otyr.
Bul vırýs túri alǵash ret 2007 jyly anyqtalǵan.
Qazirge deıin Ebolanyń osy nusqasyna qarsy resmı túrde maquldanǵan vaktsına nemese arnaıy emdeý tásili joq.
Dárigerlerdiń málimetinshe, atalǵan shtamdy juqtyrǵan naýqastar arasyndaǵy ólim-jitim deńgeıi 30–50 paıyzǵa deıin jetýi múmkin.
Sarapshylar Ebola vırýsynyń taralý joly koronavırýstan ózgeshe ekenin atap ótti.
Infektsııa aýa arqyly ońaı taralmaıdy.
Vırýsty juqtyrý qaýpi negizinen naýqastyń qany nemese basqa da bıologııalyq suıyqtyqtarymen tikeleı baılanys kezinde artady.
Osyǵan deıin DSU Ebolanyń álemde taralý qaýpin baǵalaǵan bolatyn.
