Afrıka jaǵalaýynda burǵylaý qondyrǵysy sýǵa batyp ketti: bes adam joǵaldy
ASTANA. KAZINFORM — Borr Drilling kompanııasynyń Rrospector 5 burǵylaý qondyrǵysy Gabon jaǵalaýynda sýǵa batyp ketti. Borttaǵy 115 adamnyń beseýi habar-osharsyz.
Reuters agenttiginiń habarlaýynsha, jumys kezinde jerasty jarylysy bolyp, burǵylaý qondyrǵysy turaqtylyǵyn joǵaltyp, keıinnen batyp ketken.
5-shi Prospector Bermýd araldarynda tirkelgen teńiz burǵylaý kompanııasy Borr Drilling-ke tıesili. Qurylǵy Gabon jaǵalaýynda BW Energy kompanııasynyń burǵylaý jumystary úshin paıdalanylǵan.
Borr Drilling kompanııasynyń bas dırektory Brýno Morand kompanııa joǵalǵandar men oqıǵada jaraqat alǵandardyń taǵdyryna alańdap otyrǵanyn málimdedi. Aıtýynsha, kompanııanyń qazirgi basty maqsaty - izdeý-qutqarý jumystaryn uıymdastyrý jáne barlyq qyzmetkerdiń qaýipsizdigin qamtamasyz etý.
BW Energy kompanııasy Borr Drilling, Gabon bıligi jáne tótenshe jaǵdaılar qyzmetterimen birlesip izdeý-qutqarý operatsııasyn júrgizip jatqanyn habarlady. Gabon prezıdenti Brıs Olıgı Ngema jaǵdaıdyń baqylaýda ekenin málimdep, áskerı-teńiz kúshterin qosa alǵanda, barlyq qajetti memlekettik resýrstardy jiberýdi buıyrdy.
Eldiń Munaı jáne gaz mınıstrligi oqıǵanyń sebebin jáne yqtımal jaýapkershilikti anyqtaý úshin tergeý bastady.
Belgilengen rásimderge sáıkes, BW Energy kompanııasy MaBoMo óndiristik platformasyndaǵy óndiristi de toqtatty. Kompanııanyń málimetinshe, onyń nysandaryna zaqym kelgeni nemese teńizge qaýipti zattardyń shyǵarylǵany týraly eshqandaı habarlama túsken joq.
Qaraqalpaqstandaǵy «Moınaq» ken ornyn burǵylaý kezinde gaz atqylaǵanyn jazǵan edik.
