Afrıka ulttar kýbogy: daýǵa aınalǵan fınalda Senegal quramasy jeńimpaz atandy
ASTANA. KAZINFORM – Marokko astanasy Rabat qalasyndaǵy prınts Mýla Abdýlla stadıonynda fýtboldan 2025 jylǵy Afrıka ulttar kýbogynyń chempıony anyqtaldy.
Kýbokty fınalda Marokko men Senegal quramasy sarapqa saldy.
Buǵan deıin jarty ǵasyr buryn marokkolyqtar osyndaı tabysqa qol jetkizse, Senegal 2021 jyly úzdik shyqqan edi.
Alań ıeleri favorıt sanalǵanymen, oıyn barysynda marokkolyq qaqpashy ıAssın Býný birneshe ret qaýipti soqqyny qaıtardy.
Match sońyna taman kongolyq tóreshi Jan-Jak Ndala Ngambo Marokko kapıtany Ashraf Hakımıge qatysty oıyn erejesi buzyldy dep, Senegal soqqan goldy eseptemedi.
Birneshe mınýttan keıin tóreshi Senegal qaqpasyna kúmándi penaltı belgiledi. Munyń sońy úlken daýǵa aınaldy. Buǵan narazy bolǵan Senegaldyń bas bapkeri Pap Tıav fýtbolshylaryn alańnan alyp ketti. Tek Senegal sapyndaǵy ataqty oıynshy, kezinde aǵylshyndyq «Lıverpýlda» atoı salǵan 33 jastaǵy Sadıo Mane «Biz erlershe oınaımyz» dep komandalastaryn qaıta alyp shyqty.
Marokko surmergeni Braım Dıastyń penaltıdi Panenka tásilimen soǵamyn degen dobyn Senegal qaqpashysy Edýard Mendı ońaı qaqshyp aldy.
Qosymsha ýaqyt belgilenip, onda Senegaldan Pape Gýıe 94-mınýtta jeńis golyn soqty.
Osylaısha, Senegal quramasy óz tarıhynda ekinshi ret Afrıka ulttar kýbogyn jeńip aldy.
Budan tórt jyl buryn Afrıka elderi arasynda alǵash ret álem chempıonatynyń jartylaı fınalyna deıin jetken Marokko kúmisti qanaǵat tutty.
Qos qurama bıylǵy álem chempıonatynda óner kórsetedi.
Úshinshi oryn úshin básekede penaltı serııasynda Mysyrdy jeńgen Nıgerııa komandasy qola júldeger atandy.
Eske sala keteıik, budan buryn Afrıka ulttar kýbogynyń fınalısteri belgili bolǵanyn jazǵan edik.