Afrıka Odaǵynyń astanasynda Naýryz meıramy toılandy
ADDIS-ABEBA. KAZINFORM — 2024 jylǵy 19 naýryz – Qazaqstannyń Efıopııadaǵy Elshiliginde Naýryz meıramy saltanatty túrde atalyp ótti.
Merekege Efıopııa Syrtqy ister mınıstrligi, Efıopııa Parlamentiniń Federatsııa palatasy, Efıopııa Parlamentiniń Halyq ókilderi palatasynyń ókilderi, shet memleketterdiń elshileri, «Qazaqstan dostary» klýbynyń músheleri, sondaı-aq BAQ ókilderi qatysty.
Іs-sharany asha otyryp, Qazaqstannyń Efıopııa men Kenııadaǵy (qosa atqarýshy) Elshisi, Qazaqstannyń Afrıka odaǵyndaǵy Turaqty ókili, BUU-nyń Naırobıdegi ókildigi janyndaǵy Turaqty ókili Barlybaı Sadyqov barlyq qatysýshylardy quttyqtap, Naýryz meıramyn Qazaqstanda atap ótýdiń jańa formaty týraly aıtyp berdi.
«Qazaqstanda Naýryz dástúrli Jańa jyl retinde atap ótiledi. Osy jyldan bastap Prezıdent Qasym-Jomart Toqaevtyń usynysy boıynsha Naýryz meıramy 10 kún – 14-23 naýryz aralyǵynda atap ótiledi. Onkúndik «Naýryznama» dep atalady. Ár kúnniń jeke ataýy men maǵynasy bar, ol Naýryz meıramynyń mazmunyna saı keledi», – dep atap ótti Elshi.
Elshiniń aıtýynsha, 21 naýryz jyl saıyn álemde Halyqaralyq Naýryz kúni retinde atap ótiledi. Bul kóktemniń bastalýyn, tabıǵattyń jańarýyn belgilep, álemniń kóptegen aımaqtarynda, sonyń ishinde Balqan, Kavkaz, Orta Azııa, Taıaý Shyǵys, Iran, Pákistan, Úndistan men t.b. elderde atap ótiletin kóne mereke. Naýryz beıbitshilik, otbasy, tatýlyq jáne tatý kórshilik qundylyqtaryn nasıhattaıdy, halyqtar arasyndaǵy mádenı alýan túrlilik pen dostyqty nasıhattaıdy.
Qazaqstandyq dıplomat bıyl musylmandardyń qasıetti Ramazan aıy men hrıstıandyq Hýdade Tsome oraza Naýryz merekesimen tuspa-tus kelgenin atap ótti. Ol qonaqtarǵa Naýryz meıramynyń jalpyǵa birdeı mádenı mańyzdylyǵy men sonyń nátıjesinde ıÝNESKO-nyń materıaldyq emes mádenı murasynyń reprezentatıvti tizimine engizilgenine nazar aýdardy.
Іs-shara barysynda qonaqtar «Saryarqa», «Adaı», «Kóńilashar», «Daırabaıdyń kúıi», «Balbyraýyn» atty qazaq kúılerin tyńdap, qazaqtyń dástúrli kıimderimen tanysyp, «Naýryz kóje», «besbarmaq», «qýyrdaq», «baýyrsaq» sııaqty dástúrli taǵamdardan dám tatty. Sonymen qatar, qonaqtarǵa Qazaqstandaǵy Naýryz merekesi týraly fılm kórsetildi.
Jalpy, sharaǵa qatysýshylar Naýryz meıramy alyp júretin qundylyqtardyń ámbebap sıpatyn atap ótip, bir-birin kóktem, beıbitshilik, kelisim jáne jańarý merekesimen quttyqtady. Olar qazaq halqyna birlik, beıbitshilik, meıirimdilik jáne baq-bereke tiledi.