Afrıka elderimen yntymaqtastyqty nyǵaıtý – Qazaqstannyń syrtqy saıasatyndaǵy negizgi baǵyttyń biri
Ekijaqty kelissózderden keıin Memleket basshysy men Togo Prezıdenti buqaralyq aqparat quraldarynyń ókilderi úshin birlesken málimdeme jasady, dep habarlaıdy Kazinform Aqordanyń baspasóz qyzmetine silteme jasap.
Qasym-Jomart Toqaev, eń aldymen, shaqyrýyn qabyl alyp, elimizge resmı saparmen kelgeni úshin Prezıdent Gnassıngbege rızashylyǵyn bildirdi. Memleket basshysynyń pikirinshe, Togo Prezıdentiniń sapary eki el arasyndaǵy qatynastardy damytýǵa jol ashady. Qurlyqaralyq baılanystyń joǵary deńgeıde ekenin bildiredi.
– Afrıka elderimen yntymaqtastyqty nyǵaıtý – Qazaqstannyń syrtqy saıasatyndaǵy negizgi baǵyttyń biri. Bizdiń memleketterimiz bir-birinen alysta jatyr. Soǵan qaramastan, biz Togomen tyǵyz qarym-qatynas jasaýǵa daıynbyz. Bul eldiń ózara tıimdi yqpaldastyq ornatýǵa umtylysyn tolyq qoldaımyz. Kelesi jyly Qazaqstan men Togo arasynda dıplomatııalyq baılanys ornaǵanyna 10 jyl tolady. Osy kezeńde dostyq pen ózara qoldaýǵa negizdelgen yntymaqtastyq nyǵaıa tústi. Qazir ony tyń qarqynmen damyta túsýge mol múmkindik bar. Jańa ǵana osy máseleni talqylap, mańyzdy kelisimderge qol jetkizdik. Munyń bári saıası, saýda-ekonomıkalyq, mádenı-gýmanıtarlyq jáne basqa da saladaǵy baılanysty jandandyrýǵa yqpal etedi, – dedi Qasym-Jomart Toqaev.
Memleket basshysy Togo Prezıdentimen aýyl sharýashylyǵy, jańa tehnologııa, qazba baılyqtardy birlese ıgerý, óndiris jáne ınvestıtsııa salalary boıynsha da kelissóz júrgizgenin aıtty.
– Eki el úkimetterine taýar aınalymyn arttyrý úshin naqty sharalar qabyldaý jóninde tapsyrma berýge kelistik. Ásirese, Qazaqstannyń Togoǵa dándi daqyldy eksporttaý múmkindigi zor ekenine nazar aýdardyq. Elimizdiń bastamasymen Azyq-túlik qaýipsizdigi jónindegi ıslam uıymy qurylǵanyn bilesizder. Men Togony osy uıymǵa múshe bolýǵa, onyń áleýetin paıdalanýǵa shaqyrdym, – dedi Prezıdent.
Memleket basshysy tabıǵı resýrstarǵa baı Qazaqstan men Togo elderi temir, fosfat, boksıt jáne basqa da sırek kezdesetin mıneral kenishterin barlaý, óndirý jáne ıgerý úshin birlese jumys isteý múmkindigine ıe ekenine nazar aýdardy.
– Men Qazaqstan kásipkerleri Togonyń taý-ken óndirisin zertteýge daıyn ekenin atap óttim. Sonymen qatar eki eldiń kólik-logıstıka salasyndaǵy áriptestigi jan-jaqty talqylandy. Qazaqstanǵa Lome portynyń áleýetin qarastyrý boıynsha usynys aıtyldy. Bul teńiz aılaǵy qyzmet aýqymy boıynsha Batys Afrıkada ekinshi oryn alady. Biz ózara tıimdi áriptestikti damytýǵa barynsha kúsh salýymyz kerek. Sondyqtan Togo kásipkerlerin kelesi jyly ótetin Astana halyqaralyq forýmyna qatysýǵa shaqyrdym. Olar forýmda Qazaqstannyń ekonomıkalyq áleýetimen tanysa alady, – dedi Qasym-Jomart Toqaev.
Prezıdent Astana men Lome arasynda mádenı-gýmanıtarlyq yntymaqtastyq ornatý mańyzdy ekenine toqtaldy
– Bul eki halyqtyń bir-birin jaqyn tanýyna múmkindik beredi. Osy rette Togo jastaryna Qazaqstannyń joǵary oqý oryndarynda bilim alýdy usyndym. Búgingi qatynastarymyzǵa tyń serpin berý úshin elderimizdiń Qurmetti konsýldaryn bekitýge kelistik. Bul kelisimder yntymaqtastyqty nyǵaıta túseri sózsiz, – dedi Prezıdent.
Qasym-Jomart Toqaev eki eldiń halyqaralyq jáne aımaqtyq deńgeıde tyǵyz qatynas ornatqanyn jáne kóptegen ózekti máselege qatysty ustanymdary uqsaıtynyn atap ótti.
– Ásirese, jahandyq jáne óńirlik qurylymdar aıasynda yqpaldastyǵymyz oıdaǵydaı damyp keledi. Qazirgi geosaıası jaǵdaıda Birikken Ulttar Uıymy, Islam yntymaqtastyǵy uıymy, Afrıka Odaǵy sııaqty qurylymdar arqyly ózara qoldaý kórsetý jáne konsýltatsııalar ótkizý asa mańyzdy, – dedi Memleket basshysy.
Sonymen qatar prezıdentter jahandyq jáne aımaqtyq qaýipsizdik máseleleri týraly pikir almasty.
Qasym-Jomart Toqaev For Gnassıngbeniń elimizge sapary, shyn máninde tarıhı mańyzǵa ıe ekenin jáne eki eldiń qarym-qatynasyn keńeıtýge tyń serpin beretinin jetkizdi. Sondaı-aq Ortalyq Azııa men Afrıka arasyndaǵy yntymaqtastyqty odan ári damytýǵa yqpal etetinin aıtty.
For Gnassıngbe Togonyń Qazaqstanmen yntymaqtastyq ornatýǵa erekshe kóńil bólip otyrǵanyn jáne strategııalyq seriktestikti óńiraralyq qana emes, qurlyq deńgeıinde de damytýǵa múddeli ekenin atap ótti.
– 300 mıllıonnan astam halqy bar Batys Afrıka elderimen taýar aınalymyn jolǵa qoıǵan Togo qazaqstandyq ınvestorlardyń qyzyǵýshylyǵyn týǵyzady dep oılaımyn. Aýyl sharýashylyǵy salasyndaǵy yntymaqtastyǵymyz damyp kele jatqany qýantady. Búginde sizdiń eldiń Togoǵa astyq jetkizý múmkindigi mol. Qazaqstan tsıfrlandyrý salasynda aıtarlyqtaı jetistikke jetip otyr. Biz de óz elimizde tsıfrlandyrý jobalaryn iske asyryp, osy baǵyttaǵy yntymaqtastyqty jolǵa qoıýǵa nıettimiz. Bul turǵydan sizderden úırenerimiz kóp, – dedi Togo Prezıdenti.
