Afrıka elderimen yntymaqty damytý - Qazaqstan syrtqy saıasatyndaǵy negizgi baǵyttyń biri - Toqaev
ASTANA. KAZINFORM – Afrıka eldermen yntymaqtastyqty damytý Qazaqstan syrtqy saıasatyndaǵy negizgi baǵyttyń biri. Bul týraly Aqordada Kongo Respýblıkasynyń Prezıdenti Denı Sassý-Ngessomen kelissózderden keıingi BAQ ókilderine arnalǵan brıfıngte Memleket basshysy Qasym-Jomart Toqaev aıtty.
«Eń aldymen meniń shaqyrýymdy qabyl alyp, Qazaqstanǵa resmı saparmen kelgeni úshin Prezıdent Sassý-Ngesso myrzaǵa shynaıy rızashylyǵymdy bildiremin. Qadirli qonaqtarǵa elimizge qosh keldińizder degim keledi. Bul sapar eki el arasyndaǵy qatynastardy damytýǵa jol ashady. Qurlyqaralyq baılanysty odan ary nyǵaıtýǵa yqpal etedi. Biz birqatar mańyzdy máselege qatysty kelissóz júrgizdik. Mazmundy ári maǵynaly kezdesý boldy. Qazir halyqaralyq saıasatta jáne álem ekonomıkasynda Afrıka memleketteriniń róli artyp keledi. Bul eldermen yntymaqtastyqty damytý Qazaqstan syrtqy saıasatyndaǵy negizgi baǵyttyń biri», — dedi Prezıdent.
Memleket basshysy Qazaqstan men Kongo bir-birinen alys jatqanyn atap ótti.
«Soǵan qaramastan tyǵyz qarym-qatynas jasaýǵa daıynbyz. Kongo Respýblıkasynyń ózara tıimdi yqpaldastyqqa degen nıetin qoldaımyz. Bıyl Astana men Brazzavıl arasynda dıplomatııalyq baılanys ornaǵanyna 25 jyl toldy. Osy kezeńde dostyq pen ózara túsinistikke negizdelgen qarym-qatynasymyz nyǵaıa tústi. Ony tyń qarqynmen nyǵaıtýǵa múmkindik bar. Prezıdent myrzamen osy máseleni talqylap, mańyzdy kelisimderge qol jetkizdik. Munyń bári saıası, saýda-ekonomıkalyq jáne mádenı-gýmanıtarlyq baılanystardy jandandyrýǵa yqpal etedi», — dedi Qasym-Jomart Toqaev.
