Afrıka elderine barǵan qazaqstandyqtarǵa dárigerge kórinýge keńes berildi
ASTANA. QazAqparat - Álemdik BAQ-tyń habarlaýynsha, Ebola bezgegine qatysty jańa derekter tirkeldi. Sońǵy málimet boıynsha, Ebola vırýsy AQSh-qa da jetti. Aqpan aıynan bastap vırýsty juqtyrǵandar sany 1600 adamnan asty. Osy ýaqyt aralyǵynda atalǵan aýrýdan 900-ge jýyq adam kóz jumdy.
Ebola bezgegi - Ebola vırýsynan týyndaıtyn ótkir vırýsty joǵary kontagıozdy aýrý. Ony juqtyrǵan adamdardyń 90 paıyzy qaıtys bolady. Aýrýdyń belgileri - adam álsireıdi, basy aýyrady, baspa qabynyp, býyndary men ishi aýyrady. Keıin qurǵaq jótel paıda bolyp, keýde tusy túıilip aýyrady.
Týrızm ındýstrııasy komıteti Afrıka elderine baryp kelgen adamdarǵa dárigerge kórinip, mindetti túrde densaýlyǵyn teksertýge keńes berdi. Batys Afrıka elderine bılet satatyn týroperatorlar men týragentterge halyqty epıdemıologııalyq jaǵdaı týraly habardar etip, olarǵa qaýipsizdik sharalaryn eskertýdi tapsyrdy, delingen komıtettiń baspasóz qyzmetiniń habarlamasynda.
