Afrıka elderi Ebola indeti órshise de shekarasyn jappaı otyr
ASTANA. KAZINFORM — Afrıka elderiniń densaýlyq saqtaý mınıstrleri qurlyqqa tez tarap, shamamen 5000 adamnyń ómirin qıǵan Ebola indetimen kúreste shekaralaryn ashyq ustaýǵa jáne memleketter arasyndaǵy úılestirýdi kúsheıtýge kelisti. Bul týraly Anadolu jazdy.
Afrıka aýrýlardy baqylaý jáne aldyn alý ortalyǵynyń (Africa CDC) málimdemesine sáıkes, Afrıka elderiniń densaýlyq saqtaý mınıstrleri 28 qazan kúni Ebola indetine qatysty sońǵy jańalyqtardy baǵalaý jáne birlesken qarsy sharalardy talqylaý úshin joǵary deńgeıdegi onlaın kezdesý ótkizdi.
Kezdesýge qatysýshylar aýrýdyń odan ári taralýyn boldyrmaý úshin shekaralardy ashyq ustaý jáne shekaraaralyq densaýlyq saqtaýdy úılestirýdi kúsheıtýge kelisti.
Africa CDC bas dırektory Jan Kaseıa uıym epıdemııamen kúresý úshin shekaralardy jabýdy usynbaıtynyn málimdedi. Ol shekara jabylsa adamdar shekaradan zańsyz ótý joldaryn paıdalanýǵa árekettenýi múmkin ekenin eskertti.
Kaseıa vırýstyń taralýyn boldyrmaý úshin elder arasynda aqparat almasýdy keńeıtý, epıdemıologııalyq baqylaýdy kúsheıtý jáne birlesken jaýap berý áleýetin arttyrý qajet ekenin atap ótti.
Africa CDC málimetteri boıynsha, Kongo Demokratııalyq Respýblıkasynda órshigen Ebola indeti Kenııa men Nıgerııaǵa da taraldy. AQSh Aýrýlardy baqylaý jáne aldyn alý ortalyqtarynyń (CDC) 26 qazandaǵy málimetteri boıynsha, 10 172 adamnyń bezgekti juqtyryp, 4 932 adam qaıtys bolǵan.
18 mamyrda Africa CDC indetti qoǵamdyq densaýlyq saqtaý salasyndaǵy qurlyq deńgeıindegi tótenshe jaǵdaı dep jarııalaǵan.
Tamyz aıynda Kongoda Eboladan jarty saǵat saıyn bir adam kóz jumyp jatqany habarlanǵan bolatyn.
